На Германија дефинитивно и е потребна работна сила, а Владата го забрзува процесот на миграција на странски работници. Во Бон почнува нова услуга за координирање на признавањето дипломи и квалификации.
Германската економија зависи од имиграцијата. Затоа федералната влада ја почнува програмата за привлекување странски експерти под мотото „Make it in Germany“. Тоа е национален приоритет.
– Без странските експерти не би можеле да ја поддржиме нашата благосостојба. Не можеме едноставно да ги чекаме овие луѓе, туку треба да работиме да ги привлечеме, рече министерот за труд Хубертус Хајл.
Германската статистичка служба тврди дека до 2035 година бројот на работоспособни граѓани во земјата ќе биде намален од четири до шест милиони. Во многу сектори има недостиг на работна сила. Според Германската трговско-индустриска комора (DIAC), околу 56 отсто од фирмите недостигот од работна рака го сметаат за најголем ризик за бизнисот.
Федералната влада на крајот ги послуша повиците на бизнисмените и од пред извесно време засилено работи да создаде претпоставки за привлекување експерти од странство.
По долгата дебата беше усвоен Законот за миграција на професионалниот труд, во кој федералната влада призна дека Германија е земја на доселеници – шест децении по првиот голем бран доселеници.
Главната цел на законот е да се олесни пристапот на странските работници до германскиот пазар на трудот – притоа практично во сите сектори.
– Всушност нема значење од каде доаѓа лицето, најважното е да се докаже дека сака да се интегрира во една држава, дека сака да соработува и да биде дел од општеството. И тогаш не станува збор за тоа од каде е човекот, туку како човекот сака да се интегрира, изјави федералната министерка за образование Ања Карличек за Дојче веле (ДВ).
Во понеделникот во Бон таа, заедно со својот колега Хајл, ја отвори новата институција за признавање на професионалните квалификации. Во моментов во Германија има околу 1.400 различни служби, кои се занимаваат со признавањето на странските дипломи.
Процесот на признавање досега беше пресложен и одземаше премногу време, многу подолго отколку во скандинавските земји или во САД и Канада. Со новиот Центар за признавање на дипломите тоа треба да се коригира.
Во иднина сите кои се интересираат за работа во Германија треба прво да се поврзат со новиот центар, што ќе им помогне да подготват целосна документација, неопходна за признавање квалификации, ќе им биде на располагање за консултирање и ширење на нивните кандидатури до соодветните органи во сите германски провинции.
Но, тоа што ѝ помага на Германија, од друга страна, ќе ѝ отвори големи проблеми. Имено, југоисточниот дел на Европа не го напуштаат само најдобро квалификуваните кадри со високо образование, туку и лица кои се грижат за нив, медицински персонал, мајстори, механичари итн. Од земји како Северна Македонија, Србија, Хрватска или БиХ во Германија доаѓаат повеќе од 100.000 работници.
Запрашан дали германската Влада знае што тоа ќе значи за пазарот на трудот во овие земји, министерот Хајл одговори:
„Склучивме неколку билатерални договори, на пример, да не ги повлекуваме медицинските лица од оние земји кои имаат потреба од вакви работници. Сметам, меѓутоа, дека има потреба од слобода на движењето, затоа доколку го организираме добро, тогаш ќе има корист и за двете земји и тоа, на крајот, ги засилува нашите односи“.
На 1 март годинава во Германија влегува во сила новиот Закон за миграција на професионалната работна сила. Со него ќе се олесни пристигнувањето и барањето работа во Германија за сите земји надвор од ЕУ. Во иднина граѓаните на државите членки на ЕУ веќе нема да имаат предност. Еден од регионите кон кои традиционално се насочуваат германските работодавачи е Западен Балкан.
– Во минатото добивавме многу барања од Западен Балкан. Тоа е еден од регионите што е многу важен за нас, затоа таму наоѓаме многу добра, квалификувана работна сила. Од друга страна, има многу луѓе кои знаат германски јазик, што е огромна помош при интеграцијата, за Дојче веле изјави Торстен Ролфсмајер од Федералната служба по вработување.
Мотивацијата за напуштање не се само германските плати, туку корупцијата, лошите перспективи и недостигот на правна држава. Од 2000 година наваму милиони луѓе од регионот го напуштиле.
Меѓу нив има голем број млади, високообразовани кадри, оставајќи зад себе голема пропаст на внатрешниот пазар на трудот и нараснатиот демографски проблем. Од друга страна, паричните преводи на новите гастарбајтери од страна помагаат за поддршка на социјалниот мир во нивните земји.
