Завчера во скопско Дебар Маало беше исечен дрворед, а реакциите на социјалните мрежи не стивнуваат и речиси сите се со прекор кон општинските власти, бидејќи, во минатото, токму тие протестираа кога претходната власт сечеше дрва, во многу скопски општини.
Сепак, од Општина Центар дадоа образложение зошто дрвата биле пресечени. Тие биле стари, болни, а и корените им биле плитки:
– Во дрворедот на улицата „Орце Николов“ во Општина Центар има 171 дрво, а решение има за отстранување на 13 заболени дрва.
Вчера беа отстранети осум, а на истото место ќе бидат засадени нови, информира денеска градоначалникот на Општината, Саша Богдановиќ.
Градоначалникот во одговор на новинарско прашање по вчерашната реакција за отстранувањето на дрва при реконструкцијата на улицата „Орце Николов“, посочи дека „нема да фали ниту едно дрво на местата каде што ќе бидат исечени“.
Тој посочи дека отстранетите дрва се стари, суви и без корени, а самите граѓани се чувствувале загрозено.
– Ние кога најавивме, најавивме дека нема да фали ниту едно дрва на местата каде што се засадени. Ако е утврдено дека дрвото е старо и суво, секако дека ќе биде заменето.
Луѓето реагираат при било каква промена и сеча и овие дрва се опасни. При најмал дожд или реконструкција на улицата, може да направат проблем, додаде Богдановиќ.
Како што појасни, дрворедот ќе биде обновен. Посочи дека дел од тие дрва кои вчера беа исечени воопшто немале корени и само требало посилен дожд за некој да настрада.
Додаде дека самите луѓе кои живеат во тие згради се чувствувале загрозено од гранките и се јавувале кај нив.
– Тој дрворед не е третиран со децении. Како што ќе оди реконструкцијата, се што е опасно дрво ќе биде заменето. Отстрануваме болно, старо и исушено дрво.
Прво се реакциите од граѓаните, па ние реагираме до Град Скопје и потоа се прави проценка и се отстрануваат дрвата, појаснува Богдановиќ.
Градоначалникот појасни дека денеска има екипа на терен, каде што се прават подготовки за засадување на нови дрва.
– Јас знам дека граѓаните реагираат на каква било промена во врска со сечата на дрва и зеленило, но да дополнам дека на улицата „Орце Николов“, имаше шупливи дрја, а тие што изгледаат наводно здрави на фотографиите, немаат корени. Дрво без корен е ризично. додаде Богдановиќ.
На социјалната мрежа Твитер, се појави интересно објаснување каква е процедурата, доколку некој сака да пресече дрво во Виена, Австрија:
Ако сакаш да исечеш дрво у Виена, фино лепо аплицираш со причини зошто, плаќаш адм такса ~487eur и после, доколку ти одобрат има 2 услова:
Да посадиш 15 дрва у радиус од 300 метри од исеченото дрво и да платиш по 1.000еур за секој сантиметар пречник, мерено на 1 метар над земја.
