-Граѓаните се светост и само тие определуваат кој треба да биде избран за градоначалник и затоа ние ги селектираме најдобрите можни кандидати, истакна премиерот Зоран Заев и прв човек на партијата на власт СДСМ, а во врска со амбиентот пред престојните локални избори.
Премиерот Заев нагласи дека СДСМ е фаворит во сите градови затоа што тоа го потврдуваат и анкетите.
-Драго ми е што довербата кај граѓаните за сите наши потенцијални кандидати е голема и затоа сакаат да се кандидираат добри кандидати, звучни имиња, одговорни луѓе, докажани во професијата и тоа е една голема предност која што не прави фаворити на изборите.
Покрај тоа што водиме по анкетите довербата е голема, се верува дека ќе победиме. Но, на крајот граѓаните одлучуваат. Јас можам да ви кажам заради тоа што сме коалициони партнери и со ДУИ, и со БЕСА и со ДПА, имаме коалиција, заедно ќе настапиме за локалните избори.
Нормално деталите не можеме да ги кажеме уште оти не ги знаеме имињата, но дефинитивно ги знаеме принципите на коалицирање. Се знае во првиот круг одат сите, после тоа се поддржуваме, фер, така на граѓаните ќе им оставиме сами да ни кажат патот кој е, кој треба на крајот да биде избран во сите други градови, рече Заев.
На новинарско прашање во врска со кандидатот за градоначалник на Битола, претседателот на СДСМ Заев одговори дека првите истражувања покажуваат фаворитска основа и за сегашнаа градоначалничка и за уште неколку квалитетни луѓе.
-Според истражувањaтa градоначалничката Наташа Петровска е еден од најдобрите градоначалници во државата, ама тоа го мисли Зоран Заев. Да видиме битолчани што мислат. Првите истражувања покажуваат фаворитска основа и за неа и за уште неколку наши квалитетни луѓе овде.
Но се надевам дека втората и третата анкета коишто се во тек ќе го кажат конечното, затоа што само тогаш можеме да кажеме дека ги слушаме граѓаните кои ни даваат мандат да сработиме и да оставиме зад себе задоволство. Секој пат можеме повеќе.
Тоа што е сработено во Битола во минатите години мислам дека покрива два до три мандати на поранешните градоначалници што оставиле. Зошто? Заради тоа што затекнавме блокирана општина, сега е одблокирана, развиени се проекти буквално насекаде низ Битола, истакна Заев на прес – конференција во Битола.
Бизнисменот Трифун Костовски со свој став околу локалните избори. Имено, тој бара и предвремени параламентарни избори:
Лично сметам дека предлогот локалните избори да се одржат на 31 октомври треба да се прифати од сосема прагматични причини. Долгоочекуваниот попис треба да се заврши и не смееме да дозволиме преклопување на пописот со локалните избори.
Би било многу по суштински Владата да предложи предвремени парламентарни избори, бидејќи е евидентно дека актуелнава Влада не е во состојба да му даде инпут на стопанството кое е во катастрофално лоша ситуација, а уште помалку е во состојба да го реши прашањето за утврдување на датум за отпочнување преговори со Европската Унија за наше идно членство.
Потребни се нови луѓе со свежи идеи, вграден кредибилитет, знаење и искуство.
Јас барам предвремени парламентарни избори. Барам промена на Изборниот законик во којшто гласањето мора да биде обврска со закон за секој граѓанин со право на глас во Република Македонија.
Една изборна единица, наместо шест и слободни листи. Ова е единствениот пат да Македонија тргне во вистинска насока.
