Распространувањето на британскиот сој на вирусот во западна Европа, придонесе Германија одлучи од неделата да ја затвори границата со неколку земји, односно региони.
Германија делумно ги затвори своите граници со Чешка, Словачка и австрискиот регион Тирол и покрај осудите од Европската унија.
Илјадници полицајци се мобилизирани за строги контроли на границата, што потсетува на првите денови од пандемијата, кога членките на ЕУ ги затворија своите граници, јавуваат локалните медиуми.
Според наводите на германската влада, во случајот на Чешка и Тирол, влез ќе биде дозволен за Германците, странците со живеалиште и престој во Германија, сезонски работници во земјоделството и медицински персонал.
Авиокомпаниите, железницата и автобуските компании веќе не смеат да превезуваат патници од Словачка во Германија. Исклучок се германски државјани и странци кои живеат во Германија.
Министерството за внатрешни работи соопшти дека во Германија ќе може да влезат и брачните партнери, животните придружници, малолетните деца и родители на малолетни деца, но само ако тие заедно ја минуваат границата со германските роднини.
Од забраната се исклучени и возачите на камиони и друг персонал во транспортот на стоки. Треба да биде дозволен влез и од ургентни хуманитарни причини, како на пример смртен случај. Сепак, во сите случаи кои се исклучок од забраната, важат правилата за тестирање и карантин.
Европската комисија претходно апелираше до Германија да дозволи исклучоци за луѓето кои патуваат до работното место, но министерот за внатрешни работи Хорст Зехофер тоа категорично го исклучи.
Тој рече дека германската влада нема само немо да посматра „како мутацијата на вирусот се префрла кај нас“. Граничните контроли се болни, но во моментов се неизбежни.
Ограничувањата што ги воведе Германија, ги принуди и австриските власти да ја интензивираат контролата на границата со Италија, бидејќи вчера и денес се создадоа долги редови автомобили и камиони.
Возачите на камиони кои од Тирол вчегуваат во Германија, од вчера треба да покажат негативен тест на Ковид-19.
Јужната граница на Тирол е со Италија. Австриските власти стравуваат дека возилата и камионите кои од Италија транзитираат преку Тирол за Германија не ги поседуваат сите документи кои ги бара Берлин и поради тоа би можеле да останат блокирани на австриска територија. Поради тоа интензивирана е контролата на австриската граница со Италија.
– Нема да дозволам Тирол да стане паркинг на Европа. Не можеме да им гарантираме премин на возачите од Австрија во Германија, изјави гувернерот на австриската провинција Тирол, Гинтер Платер.
Асоцијацијата на италијанските превозници и локалната власт на северната италијанска област Трентино побараа реципрочни мерки односно тестирање на возачите кои доѓаат од Германијаи и од Австрија.
На автопатот во Италија во близина на границата со Австрија поставен е центар за брзо тестирање на Ковид-19.
Од 4.000 до 5.000 камиони дневно поминуваат преку магистралниот пат А12, што е една од најважните сообраќајни артерии меѓу Јужна и Северна Европа.
