Поранешниот министер за здравство, Никола Тодоров упати порака до претседателот на ОК Карпош, во која бара да го повикаат на состанок за да може да ги предочи своите факти и докази, па дури потоа ОК да носи одлуки. Ова доаѓа по барањето на актуелното раководство на партијата Никола Тодоров да биде исклучен од партијата.
Пораката што Тодоров му ја упати на претседателот на ОК на ВМРО-ДПМНЕ – Карпош, Тони Јаревски Ви ја пренесуваме во целост:
„Audiatur et altera pars!
Имам право на тоа. Ако барем малку верувате во четирите свети букви.
ВМРО е Демократска Партија за Македонско Национално Единство. Демократска! Ако е така, не само што јас имам право на тоа, туку вие имате обврска.
Имате обврска да ме ислушате, да ми ги предочите вашите факти и докази, но и да ги слушнете мојте. Ова е темелно начело на правдата и еднаквоста и немате никакво право да ми го ускратите тоа.
Затоа барам да ме повикате на состанокот на ОК, да ми ги презентирате фактите и доказите против мене, да ги слушнете моите аргументи, и потоа да ја донесете одлуката.
Да те потсетам Тони, и во социјализмот/комунизмот постоеше и се применуваше ова правило во сите случаи освен кога стануваше збор за политички ликвидации и политички монтирани случаи. ВМРО се бореше против тоа и за жал и самото беше жртва на таквите политички ликвидации и конструкции.
Лошо и недозволиво е што и денес, во слободна, суверена, самостојна и демократска Македонија треба да се бориме против истото. Но не е тешко, ништо не е тешко кога се бориш за татковината, ќе се изборам.
Во очекување на позитивен одговор,
Те поздравувам
П.С. Го барам ова јавно, бидејќи се чуствувам слободен и бескрајно верувам во демократските принципи на кои се темели мојата партија“ напиша Тодоров на Фејсбук.
