Актерот Васил Зафирчев кој имаме прилика да го гледаме во улогата на Марио во „Преспав“ во интервју за музика24 откри како се подготвува за престојните празници.
„Новогодишните и Божиќните празници секогаш ме асоцираат на детството, топлината и хармонијата во домот, заедничките мигови споделени со семејството и најблиските, но и добрите и хумани дела за оние на кои тоа им е најпотребно. Ја сакам празничната атмосфера и украсувањето на домот, но никогаш не чувствувам преголема возбуда или еуфорија. Со оглед на секогаш интензивните професионални ангажмани на крајот од годината, го претпочитам одморот и можноста за релаксација за време на празниците“.
Васил откри дека како дете верувал во приклазните за Дедо Мраз.
„Само како дете верував во приказната за неговото постоење и со нетрпение го очекував негово доаѓање. Сега како возрасни, суштината и значењето на неговиот лик и порака треба да ја практикуваме самите, секогаш настојувајќи токму ние да бидеме нечив Дедо Мраз, кој ќе ги подготвува убавите изненадувања за другите и ќе ги исполнува желбите на оние кои ги сакаме и кои ни значат“ раскажува Васил.
Бидејќи за Новогодишните празници традиција и обичај е да си купуиваме подароци за најмилите, новогодишни пакетчиња, Васил откри дека тој како дете ги ставал новогодишните чорапчиња под елка со надеж дека следното утро ќе најде подарок.
„Како многу мал да, со голема возбуда и радост ги оставав новогодишните чорапчиња под елката, силно надевајќи се дека следното утро во нив ќе го најдам она што сум си го посакал.
Во најраните години од детството мојот Дедо Мраз тоа го правеше тивко, нечујно и невидливо за мене. Подоцна почна и вистински да се појавува на вратата од мојот дом, точно на полноќ, лично предавајќи ми го најпосакуваниот подарок.
Голем дел од тие подароци и ден денес ги чувам со внимание и секогаш ме потсетуваат на таа невидена детска радост за време на празниците“, вели за музика24.
