Ѓулзим Галипи е еден од патниците кој патувал со автобусот кој вчера се преврте кај село Ласкарци, на автопатот Скопје-Тетово и кој за Алфа вели дека ужасниот миг што ќе го памети цел живот. Во автобусот на смртта се качил во Скопје, ништо не навестувало дека патувањето пред време ќе заврши кај Ласкарце, со лелек, врисоци, многу крв …
Ѓулзим кажа дека критичниот миг му е како на сцена од страшен филм, се било како дел од секунда. Додека автобусот бил во движење, пред да почне да застранува од коловозот, не се слушнало ништо, ниту пукање на гума, ниту кочење. Прво се чул звукот од ударот во банкина, патниците почкале да паничат, се слушало врискање, некои викале „помош“, вториот тресок бил последното нешто што го слушнал Џулсим, и потоа мрак.
Не знаел кој го извлекол од автобусот, се разбудил во болница, прво што видел кога се освестил биле лекарите.
Автобусот бил преполн со патници, но не познавал лично никого од оние што се возеле, иако ги боли целото тело, загрижено прашуваше како се останатите патници.
Единствена сила на Галапи му даваат гласовите на двете малолетни деца кои ги слуша на телефон, сака што побрзо да замине дома и да ги види. На разделување ни кажа дека патот кој го минува 14 години за да дојде од родниот Гостивар на работа во Скопје, секогаш ќе му го враќа кобниот миг од 17 часот на 13 февруари, кога и погледна во очи на смртта.
ОЈО се огласи за несреќата кај Ласкарци:
Надлежниот јавен обвинител од Основното јавно обвинителство Скопје заедно со увидни екипи на Министерството за внатрешни работи денеска во 13.15 минути го заврши увидот на лице место на тешката сообраќајна несреќа што се случи вчера на патниот правец Скопје-Тетово, во која 14 лица го загусбија животот, а повеќемина се повредени.
Интензивно се работи на утврдување на сите детали кои можат да ги откријат причините за несреќата. Со оглед на тежината на самиот настан и обемот на истражни дејствија кои ќе се преземат во претходна постапка во постапувањето по овој предмет е вклучен и втор јавен обвинител од Основното јавно обвинителство Скопје.
Автобусот на компанијата „Дурмо турс“ кој преминувајќи преку двете сообраќајни ленти излета од автопатот и се преврте во близина на стариот пат е подигнат од местото на несреќата и по наредба на јавниот обвинител врз него ќе се врши детално техничко вештачење од страна на Mашинскиот факултет во Скопје. Заради правилно утврдување на фактите, денеска на местото на несреќата беше присутна и екипа на Mашинскиот факултет која ги направи првите проверки на исправноста на возилото. Од досегашните сознанија утврдено е дека автобусот бил набавен во 2001 година, а последен пат бил регистриран во јануари 2019 година. По наредба на јавниот обвинител, Машинскиот факултет ќе изготви писмен вешт наод и мислење.
На лице место со јавниот обвинител денеска беше присутна и екипа на Бирото за судски вештачења, од каде треба да биде изготвен писмен вешт наод и мислење за причините на сообраќајната незгода.
Надлежниот јавен обвинител ќе ја побара целокупната документација од компанијата „Дурмо турс“ во врска со дозволите за јавен превоз кои ги поседува, одржувањето на возилата, бројот на патници и продадени карти во автобусот кој сообраќал на релацијата Скопје-Тетово, како и податоци во врска со работното време и релациите кои ги поминал возачот на критичниот ден.
Возачот кој управувал со автобусот е хоспитализиран и се здобил со телесни повреди. Веднаш по несреќата јавниот обвинител имаше првичен разговор со него и притоа тој не даде релевантни податоци за целиот настан. Јавниот обвинител усно е известен дека анализата на примероци на крв и урина покажала дека во моментот на несреќата кај возачот не е регистрирано присуство на алкохол, лекови или психотропни супстанции. Со барање на листинзи од мобилен оператор ќе се утврдува дали возачот во моментот на несреќата користел мобилен телефон.
На Институтот за судска медицина, по наредба на јавниот обвинител извршена е обдукцијата на 13 од починатите лица, додека за едно лице обдукцијата е во тек. Од страна на увидните екипи на Министерството за внатрешни работи по завршениот увид до Основното јавно обвинителство Скопје ќе бидат доставени записниците за увид, скицата, фото документацијата и други обезбедени материјални докази.
По приемот на овие докази, по доставување на обдукциските протоколи, медицинската документација за повредите на другите патници, извештаите за наредените вештачења, по испитување на возачот, на патниците во автобусот и на очевидци на настанот, како и по обезбедувањето на целокупната релевантна документација, во зависност од утврдените факти, обвинителството ќе донесе јавнообвинителска одлука.
