Една четвртина од граѓаните велат дека или тие или некој од нивното семејство останале без своето работно место поради корона кризата покажува најновото истражување на јавното мислење кое за Детектор го спроведе Институтот за политички истражувања Скопје.
Според него, 25,8% од анкетираните велат дека или тие или некој од нивното семејство привремено или трајно останале без работа поради корона кризата, додека 67,8% од анкетираните велат дека го немале тој проблем.
14,4% од граѓаните велат дека поради кризата приходите во нивното семејство се намалиле. 47,4% велат дека немаат намалување на семејните приходи, додека 32,4% велат дека донекаде имаат намалување на приходите.
Истражувањето на јавното мислење по нарачка на Детектор телефонски го спроведе Институтот за политички истражувања Скопје врз репрезентативен примерок од 1123 испитаници во периодот од 21 до 24 април со маргина на грешка од плус-минс 3%.
Над 40% од граѓаните велат дека не знаат дека Македонија добила помош од странство во време на корона кризата. Според најновото истражување на јавното мислење, кое за Детектор го спроведе Институтот за политички истражувања Скопје, 58,5% од граѓаните велат дека се информирани дека поради корона вирусот, во Македонија има пристигнато помош или донација од странство, додека 41,5% велат дека немаат такви информации.
18,6% од граѓаните велат дека најголема помош за Македонија очекуваат од Европската Унија, по 3,7% од НАТО и Турција, 2,7% од Словенија, 2,2% од Кина и по 2% од САД и Русија. 31,2% велат дека помош не очекуваат од никого.
Граѓаните сметаат дека на Македонија во моментов најмногу и треба финансиска помош. Ваков став имаат 39,7% од анкетираните. 24,8% сметаат дека најнеопходна во моментов е медицинската помош, 14,3% сметаат дека од меѓународниот фактор ни треба помош во стручен медицински персонал, 10,6% во лекови и 2,6% во храна.
Извор: ТВ Сител
