Во текот на завчерашниот ден, главна тема во македонските медиуми беше позитивниот тест на колегата новинар Гоце Михајлоски, уредник во Канал 5 телевизија.
Тој во неговата блиска фамилија имал член кој е позитивен на коронавирусот, изјави директорката на ДСЗИ, Ирина Бухова.
Михајлоски последниот викенд од претходниот месец бил во Прилеп кај неговото семејство, а по три дена, откако се вратил, ги интервјуирал прво лидерот на опозицијата Зоран Заев, а потоа и лидерот на ВМРО-ДПМНЕ, Христијан Мицкоски.
„Споменатото лице е хоспитализирано во ‘8 Септември’ каде е потврден позитивен наод на коронавирусот. Да, во блиска фамилија на споменатото лице има член кој е позитивен, новинарот имал контакт со тој член на неговата фамилија.
За детални информации, кој и каде ќе биде ставен во самоизолација, ќе биде донесена одлука откако ќе заврши епидемиолошката анкета која е во тек“, рече Бухова.
„Канал 5“ веќе објави дека Михајлоски по враќањето од Прилеп продолжил со работа во дневно-информативната редакција, без никакви елементарни сомнежи ниту симптоми.
Првите симптоми , според телевизијата, кај колегата Михајлоски се појавиле по шест дена, односно на 5 април. Михајлоски почувствувал изнемоштеност, замор и главоболка, по што веднаш околу 17 часот го напуштил работното место. Дотогаш, како главен и одговорен уредник на телевизијата, имал контакти со речиси сите новинари, односно репортери.
Вчера на социјалните мрежи можеа да се видат наразлични коментари, најчесто со осуди на новинарот, како тој да е виновен или да сакал да се најде во состојбата во која што е.
Единствено што држи е доколку навистина има заразен во неговото семејтсво и Михајлоски имал директен контакт со него, а потоа продолжил да оди на работа, тогаш тоа е неетички, неодговорно и за секоја осуда.
Но има една друга опција за која малку кој разговара. Тоа е некој од неговите гости во емисиите кои ги води, па зошто не и Христијан Мицкоски или Зоран Заев да го заразил него!
Завчера вечерта веднаш, кај двајцата, Мицкоски и Заев беа направени тестови, кои беа негативни. Но овде ќе поставиме прашање. Што доколку тестот кај некој од двајцата лидери бил лажно негативен? Дали им е направен контролен, втор тест?
Бидејќи, познато е дека најголеми сејачи на овој вирус се асимптоматските носители, односно оние кои се заразени, но немаат никакви симптоми. Се смета дека такви се преку осумдесет проценти.
