Состојбата со пандемискиот вирус во регионот, но и во цела Европа, па и пошироко, е со променлив карактер во изминатата година, од почетокот на кризата. Изминатиот месец се случуваше таканаречен трет бран, кој во последните денови како да се смирува.
Српскиот епидемиолог д-р Бранислав Тиодоровиќ, по денешниот состанок на Кризниот штаб изјави дека ситуацијата со корона вирусот е сè уште вонредна, но дека има извесни подобрувања, што може да овозможи повторно отворање на трговските центри од понеделник и враќање на учениците во училиштата од 19. април, додавајќи дека ако сегашниот тренд на вакцинација продолжи со вакво темпо, за еден и пол месец, може да се воспостави колективен имунитет.
-Одѕивот за имунизација е исклучително добар. Ова е решение за целата ситуација, и секако понатамошно почитување на мерките. Целта е да се покрие што е можно повеќе вакцинација во најкус можен рок, со цел да се спречи ширењето на мутациите.
Мора да бидеме реални. Можеби сме најдобри во Европа во однос на тоа колку видови на вакцини обезбедуваме и во однос на одѕивот на популацијата, но тоа не зависи само од нас, туку и од испораките за тоа колку ќе добиеме понатаму вакцини.
Се надеваме дека ќе го продолжиме овој добар тренд, и ќе ја имаме договорената динамика – рече тој, додавајќи дека, за еден и пол месец, може Србија да го достигне колективниот имунитет на населението. Има простор за оптимизам, рече тој, изразувајќи надеж дека бројот на упокоени ќе се намали.
Бугарија ќе отвори училишта, ресторани и кина од понеделник, откако третиот бран на пандемија на ковид започна да покажува знаци на слабеење, објави тамошниот министерот за здравство Костадин Ангелов.
Трговските центри ќе бидат отворени подоцна следната недела, а кафулињата и ноќните клубови ќе можат да примаат гости со капацитет од 50 проценти од 29 април, објави Ројтерс.
Балканската земја со седум милиони жители вчера регистрираше 3.556 случаи на ковид, помалку од последните тринеделни просеци од околу 4.000 случаи на ден.
„Сведоци сме на првите чекори што водат кон крајот на третиот бран“, рече Ангелов, додавајќи дека училниците ќе бидат отворени под специјален надзор на чуварите кои ќе следат дека училиштата не се преполни.
Третиот бран на пандемија во Бугарија беше многу силен, а таа беше земја со најголем број упокоени во Европа по Унгарија, според научните податоци на страницата „Нашиот свет во податоците“.
Од почетокот на пандемијата, регистрирани се 364.419 случаи во Бугарија, а 14.034 пациенти поч инале.
Кај нас се чини состојбата е најнестабилна, со оглед на тоа што имунизацијата почна релативно доцна, практично оваа недела. Она што беше претходно, со донацијата од Србија, се имунизираше претежно медицинскиот персонал.
Деновиве беа забележани голм број упокоени, а дополнителен немир кај населението се појави по контрадикторните ставови за вакцината Астра Зенека, со која во моментов се имунизира кај нас.
Иван Џикиќ, молекуларен биолог и директор на Институтот за биохемија на Гете Универзитетот ви Франфурт, синоќа гостуваше преку Скајп на хрватската телевизија РТЛ, пренесува Индекс.хр.
Тој е вакциниран со вакцината на АстраЗенека, бидејќи тков бил распоредот на вакцинација во неговата болница.
„Бев вакциниран со АстраЗенека според распоредот во нашата болница. Имав мали несакани ефекти, малку црвенило и болка во рамото и малку треска само една ноќ. Досега сум добро”, рече тој.
„Сакам да ги едуцирам и информирам граѓаните. Тие нема да се плашат ако разберат колку е мала, мала е можноста за ваква сериозна компликација.
Секоја кампања за промовирање на вакцинацијата мора да биде насочена кон правилно информирање и слободна волја и донесување одлуки на граѓаните. Со прифаќање на тој ризик., што може да биде, но е многу мал“, додава тој.
Џикиќ рече дека веројатноста за појава на тромб е незначително мала. Како и да е, вели тој, не треба да се игнорира.
„Тоа е занемарливо. Но, сепак, кога тоа ќе се случи, звучи многу опасно во медиумите и не треба да се игнорира. Треба да им се испрати порака на граѓаните дека во животот тие преземаат многу, многу поголем ризик за други работи, како што се возење автомобил или авион.
Понекогаш овие случаи ви се толку очигледни, но луѓето не размислуваат за тоа. Затоа во таа кампања треба да го претставите графички на граѓаните и тогаш ќе видите дека граѓаните ќе го прифатат тој ризик како составен дел од заштита на себе и општеството околу нив, рече Џикиќ.
Тој вели дека има помалку шанси да добиеме тромб од вакцината отколку ако патуваме со авион до Австралија.
“Според податоците што ги имаме досега, помала е веројатноста да имате длабока тро мбоза ако сте вакцинирани со АстраЗенека, отколку да патувате од Европа во Австралија на тие долги летови.
Шансите за развој на длабока тро мбоза кај жените се исто така големи кај оние кои користат контрацептивни средства. Има податоци дека повеќе од 100 милиони жени на возраст меѓу 16 и 30 години користат контр ацептивни средства, а шансите за заболување од тромбоза се 0,1 процент.
Гледате дека ова е три децимална разлика. Но, жените сепак го преземаат тој ризик по своја слободна волја и често се јавуваат многу тешки компликации, многу често поблаги компликации. Но, компликациите се секогаш тука и треба да се земат како ризик “, вели тој.
