Тројцата македонскит државјани кои се наоѓаат на брод кој е под карантин закотвен во Јокохама, Јапонија се членови на екипажот и се наоѓаат во добра здравствена состојба, информираат од МНР.
– Информираме дека Амбасадата на Република Северна Македонија во Токио оствари директна комуникација со тројцата македонски државјани кои се наоѓаат на бродот “Diamond Princess”, во Јокохама, Јапонија. Станува збор за двајца мажи и една жена, членови на екипажот и се наоѓаат во добра здравствена состојба, се вели во официјалните информации од МНР.
Крузерот е во карантин во пристаништето Јокохама, откако кај еден патник што се симнал од бродот во Хонг Конг му бил дијагностициран вирусот.
Еврокомесарот за управување со кризи, Јанез Ленарчич, утрово го посети Европскиот центар за координација на итната помош во рамките на борбата против коронавирусот. Тој предупреди дека епидемијата е сериозна и дека за Европската Унија јавното здравје врвен приоритет.
Комесарот потврди дека министрите за здравство на Европската Унија ќе се состанат кон крајот на оваа недела за вонреден министерски совет и порача дека Европската Комисија ја поддржува оваа иницијатива за да се интензивира соработката и координацијата на земјите членки.
Ситуацијата е загрижувачка, ова претставува сериозна опасност за јавното здравје, вирусот се шири со голема брзина, и мерките мора да се преземат на координиран начин, изјави пред медиумите Ленарчич.
Европската Комисија не е одговорна и не одлучува за репатријација на заразените од Кина кон Европа, обврската е во рацете на националните власти, но ЕК им помага во напорите за координација. ЕК до сега спроведе репатријација на над петстотини ЕУ граѓани, потсети еврокомесарот и интензивно соработува со кинеските власти.
Во постојан контакт сме со кинеските власти за да видиме како можеме заеднички да го спречиме ширењето на вирусот, сега е време да ги здружиме нашите сили, да работиме заедно, да сториме сѐ за да ја стопираме епидемијата, изјави Ленарчич.
Тој додаде дека е “можно ситуацијата прво да се влоши пред да се подобри“ и дека тоа само ќе ги “мотивира повеќе“ европските власти во нивните напори за спречување на заразата.
Запрашан дали им верува на податоците и информациите на кинеските власти, кои долго време го криеја интензитетот и постоењето на вирусот, еврокомесарот порача дека “нема причина да не им веруваме на кинеските бројки“.
Европската Комисија ги помага и напорите на научниците за нова вакцина против коронавирусот, одвоени се десет милиони евра за оваа цел, потсети комесарот.
Тој призна дека последиците од вирусот врз кинеската економија најверојатно ќе имаат негативен економски импакт во Европа и во целиот свет, но порача дека во овој момент главен приоритет е здравјето на граѓаните.
Економските последици иако се важни се второстепени, изјави Ленарчич.
На бродот има околу 3.700 патници и членови на екипаж. Досега е утврдено присуство на вирусот кај 130 патници на бродот.
