Од Светската здравствена организација, кои веќе два дена заседаваат на експертско ниво во Женева најавија дека вирусот доби официјално име Ковид 19.
– Сега го имаме официјалното име на болеста и тоа е Ковид-19 – изјави генералниот директор на СЗО, Тедрос Адан Греберес.
Во Кина е одложена трката на Формула 1 што треба да биде во април а поради дијагностицирање на корона вирусот кај вработен во Сингапур е евакуирана банка.
Бројот на починати се искачи над 1100 а повеќе од 44 000 се заразени. Утре на вонреден состанок во Брисел, министрите за здравство од ЕУ ќе заседаваат поради заканата од коронавирусот.
Ќе расправаат за евентуално прекинување на летови до и од Кина како и преземање на други мерки за заштита на населението.
Две Русинки кои се наоѓале во болнички карантин во Русија поради сомнеж за инфекција со коронавирусот додека престојувале во Кина, изјавија дека избегале од болница поради некооперативниот однос на лекарите, лошите хигиенски и други услови во здравствената установа и поради страв дека тука ќе се заразат со новиот вирус.
Едната жена скокнала низ прозор за да избега од болничкиот карантин, а другата избегала откако го онеспособила електронскиот механизам на вратата од својата болничка соба.
Двете пациентки објаснуваат дека нивните болнички маки почнале по враќањето од провинцијата Хаинан, тропска област која е популарна меѓу руските туристи.
Голем број пациенти кои се наоѓаат во карантин во различни руски болници постојано се жалат на многу лошите услови во собите за изолација и недостаток на соработка со лекарите, кои не се запознати со правилата за карантин.
Протоколите за карантин низ Русија се различни. Некаде се изолираат кинески државјани кои неодамна се вратиле од Кина, а на други места сите кои ќе пријават симптоми слични на коронавирусот се ставаат во 14-дневен карантин.
