Вечерашниот ТВ дуел на Канал 5 во „Само вистина“ помеѓу лидерите на СДСМ, Зоран Заев и на ВМРО-ДПМНЕ, Христијан Мицкоски заврши ефектно.
Имено Заев на Мицкоски му подари беџ со знамето на европската унија и на знамето на Македонија што лидерот на ВМРО -ДПМНЕ го зема.
Но и Мицкоски не му остана должен, па му врачи празен паричник на Заев кој веднаш го одби и му го врати и кажа дека тој е чесен и поштед политичар.
Во ТВ дуелот на Канал 5, Зоран Заев соопшти дека ќе биде носител на кандидатската листа во четворка, го покани Мицкоски да го победи на домашен терен.
–Јас ќе бидам носител во четворка, го канам да го победам на домашен терен.
Вие сте националист, ние ја имаме најголемата победничка коалиција….Имате компир, нула гласови кај Албанците, му рече Заев на Мицкоски во вечерашното гостување на политичките опоненти, на Канал 5 телевизија.
„Играте на карта на национализам, ве уверувам дека треба да внимавате. За мене е многу важно што конечно имаме предизобрна коалиција со сите етнички заедници, коалицијата е изградена на темелни вредности во кои заеднички веруваме“, му се обрати Заев на Мицкоски.
Мицкоски во дебатата ги отфрли обвинувањата што му ги упати претседателот на СДСМ Заев дека опозициската партија лобира државата да не добие датум за преговори за членство.
– И Пленковиќ и Орбан и Јанша и сите останати премиери кои се дел од ЕПП лобираат и ќе продолжат да лобираат Македонија да добие датум затоа што граѓаните заслужуваат иако сме понижени, омаловажени, со урнато достоинство поради капитулантските политики на Заев барем малку нешто што ќе ја залечи раната која се уште стои. Се ќе сторам како претседател на ВМРО-ДПМНЕ тоа да се случи час поскоро, и ќе зборам и со Јанша, Пленковиќ и Орбан, Курц со сите премиери кои се членки на ЕУ да се даде затоа што тој датум не е привилегија, ниту на Христијан, ниту на Зоран Заев, рече Мицкоски.
