После објавувањето на шокантните фотографии од исфрленото ѓубре зад студентскиот дом „Пелагонија“; од страна на неговите жители, студенти, скопските комунални претпријатија презедоа акција за чистење на надворешниот простор од домот. Од Град Скопје велат дека не е нивна одговорност да ги чистат студентските дворови, тно оваа акција ја преземаат како чин за освестување на граѓаните.
„И покрај фактот дека чистењето на ваквите површини не е во наша надлежност, ЈП „Комунална хигиена“-Скопје ќе ги спроведе овие активности, со цел да се спречи ширењето на заразни болести и да се заштити животната средина. Oваа недела ќе ја посветиме токму на подигнувањето на јавната свест за штетноста од несовесното постапување со отпадот и опасноста од создавањето диви депонии коишто директно ја загрозуваат животната околина и претставуваат закана за здравјето на граѓаните. Секој ден во неделата ќе исчистиме по една црна точка – започнавме во Топаана, денес сме во студентскиот дом „Пелагонија“ и до крајот на неделата ќе посочиме уште неколку локации каде што и покрај секојдневните интервенции на нашите екипи постојано се создаваат диви депонии, како резултат на неправилното одлагање на отпадот од страна на граѓаните“, изјави директорот на ЈП „Комунална хигиена“ – Скопје, Абдусамед Шабани.
Директорот на домот, Бујар Муртезани најавува дека ќе се постават камери за надзор за да се идентификуваат неодговорните студенти, најавувајќи парични казни и исфрлање од студентскиот дом.
„Службите секојдневно ја извршуваат својата работа и го чистат ѓубрето. Повеќе смет се собира за време на викендот кога службите не работат. Апелирам сите студенти да се однесуваат посовесно за одржување на хигиената и за зачувување на животната средина“, рече Муртезани.
Во овој дом има околу 1.000 студенти кои се жалат на условите за сместување и услугата во мензата. Тие, по најавената акција за чистење, самите го отстранија сметот.
Баш убаво што кренавте толкава узбуна па се исчисти ѓубрето во Пелагонија. Што убаво ќе беше да дигавте ваква узбуна и да доаѓавте да снимате секогаш кога на -20 се туширавме со ладна вода, секогаш кога јадевме лебарки, кога ни врнеше снег секоја зима и во собите, кога на минус температури ни ги земаа греалките и ни велеа дека ако ни е ладно да седиме во јакни, па кога на секој дожд ќе ни заврнеше и внатре, па кога се бркавме со стаорците низ собите или кога ќе имавме проблем па го саниравме сами.
Или кога ќе влегуваше секој којшто ќе посакаше во домот, пијани крадејќи не. Па моравме да бараме помош од полицијата зошто нели бевме премногу заштитени од надлежните во домот.
Што убаво ќе беше денес кога ја снимавте депонијата, на која ви текна после пет години, да снимавте и внатре, па да се згрозите уште повеќе од онаа на кое бевте згрозени. И не дека подржувам вакво нешто, далеку од тоа, но камо вие како медиуми толку да дигавте узбуна кога ние ги раскажувавме нашите проблеми поврзани со споменатиот дом.
И да, ѓубрето го исчитивте, а срамот на студентите остана, а сигурна сум дека и секоја ладна зима, секое преладување после туширање со ладна вода, секоја лебарка ќе останат засекогаш во нас – ете како нашиот најголем срам!
