Во 2005 година Дубравка Делева, од Сушево, била на смртна постела, нејзините најблиски го очекувале најлошото, кога на сон и се јавил Св. Георгиј со порака дека има спас за нејзиниот живот. Ја искачил на ридот над нејзиното село Сушево и ѝ го покажал местото каде требало да остави дар за Бога. Една недела Дубравка не можела да стане од постела, болките се зголемувале, а здравјето ја напуштало се повеќе и повеќе.
Местото кое го сонила не било далеку, на десетина минути пешачење, а по краткиот пат со соседката стигнале на сонетата локација. Било полно со трње и плевел, но токму тоа место кое на сон и го покажал големиот великомаченик. Дубравка го оставила дарот и за миг застанала на нозе. Во Божјото чудо не можела да верува ниту самата. Трчајки заминала сред село како никогаш да не била болна.
– Од тогаш започнав нов пат, нов начин на живот, вели Дубравка која додава дека Св. Георгиј повторно го сонила.
Новиот сон бил со нова порака. На местото каде го оставила дарот Дубравка добила задача да ги пронајде темелите на стариот манастир и да изгради соба во која на празникот ќе може да доаѓаат сите верници.
Благодарна за новата шанса за живот Дубравка го исполнила ветеното. За кратко со семејството подигнале соба во која секоја година веќе една деценија се празнува името на Св. Георгиј. Кратко по градбата, со семејството успеале да ги пронајдат темелите на стариот манастир.
– Бев пред крајот на животот, но никој во семејството не веруваше во мојот сон. По една недела на посета дојде мојата соседка на која и го раскажав сонот, таа ме крена на раце и заминавме да го бараме местото кое ми го покажа Св. Георгиј, раскажува за проверено.мк Дубравка.
– Успеав да ги изведам на виделина ѕидините кои пред дамнешни години биле симбол за ветата христијанска. Се што видов на сонот постои, тоа е потврда за мојата силна вера во Бога, вели Дубравка.
Копајки во земјата која во вековите наназад го покрила светиот храм, таа и верниците кои доаѓаат во село Сушево биле сведоци на уште три чуда. На три различни празници, тројца различни верници кои помагале во работата ги пронашле ликовите на светци на три камења. Едниот од нив Св. Јован, мајката Божја и Св. Георгиј.
Свети Великомаченик Георгиј Победоносец живеел и пострадал за време на безбожниот римски цар и идолопоклоник Диоклецијан (284 – 305 година). Неговите родители биле богати, доброчесни и побожни. Неговиот татко маченички пострадал за верата што и придонело малиот Георгиј така силно да го засака Христа и сецело да Му се предаде, да Му служи и со својот живот маченички да ја потврдии исповеди својата вера и љубов кон Христа Господа.
Неговата мајка била родена во Палестина која, исто така, уште од неговото детство успеала да го воспита и насочи својот син во вистинската вера и наука. Свети Георгиј се смета за покровител на Москва, Грузија, Англија, а исто така е доста почитуван во Палестина и на Балканот.
