Долгогодишниот претседател на Вардар, Михајло Михајловски, е подготвен да помогне за надминување на кризата во таборот на актуелниот европски првак.

Тој веќе имал и состанок со ракометарите, на кој бил присутен и актуелниот газда, Сергеј Самсоненко, при што се дискутирало за решавање на огромните финансиски проблеми со кои се соочуваат „црвено-црните“.

Иван Чупиќ не може да крене глава од новинарите, кои се интересираат за ситуацијата во вардаровиот табор, особено за фактот како тој и неговото семејство се снаоѓаат без воопшто да примат плата.

„Секако дека не е идеално, но за нас играњето без плата и не е никаква новост или нешто што ни се случува првпат. Семејството ми е в ред и тоа ми е најважно. Секој си има своја работа, некој оди во градинка, некој во училиште, некој игра ракомет. Се навикнавме на беспарицата. Се издржува, можеме да преживееме и без плата, ама не и без овој Вардар“, открива Чупиќ.

Според хрватскиот крилен ракометар, во тимот сите се свесни за големите финансиски проблеми, но тие што во моментов се тука воопшто и не размислуваат да си заминат пред крајот на сезоната. Тој откри дека имале состанок со сопственикот Сергеј Самсоненко и дека до крајот на месецов многу повеќе работи околу иднината ќе бидат познати.

„Ниту ние што останавме, ниту навивачите кои ги има во голем број не сме се откажале од Вардар, а сигурен сум дека тоа никогаш нема да се случи. Сѐ останато е висока политика во која не се разбирам.

Имавме состанок со Самсоненко и Михајло Михајловски, кои ни кажаа многу повеќе работи ќе се знаат до крајот на месецот. Што конкретно, не знам. Но, како и да е, до крајот на сезоната сум тука, а мислам исто размислуваат и останатите. Би сакал така да остане, да се стабилизираат работите, но засега навистина не знам ништо“, додаде Хрватот.

Вардар минатиот викенд го победи Мотор иако пред натпреварот остана без двајца важни ракометари, Данаис Криштопанс и Павел Атман, кои не издржаа да играат без плата и си најдоа нова средина. Добрата игра и големата енергија им дава надеж на црвено-црните за уште подобри игри во решавачкиот дел од сезоната во Лигата на шампионите и во СЕХА-лигата.

The post Ракометарот на Вардар емотивно – Се навикнавме на беспарицата, можеме да преживееме и без плата, ама не и без овој Вардар appeared first on Галама.

Американскиот боксер Флојд Мејведер е најбогатиот спортист во светот според заработката од 2010 година наваму, објави магазинот „Форбс“.

На второто и третото место зад него се фудбалерите Кристијано Роналдо и Лионел Меси.

Мејведер во оваа деценија заработил 915 милиони долари. Роналдо спечалил 800, а Меси 750 милиони. Во сумата се земаат во предвид парите од платата, награди, премии, бонуси и права за слики. Не се сметаат финансиските приходи кои ги земаат по завршувањето на кариерата.

Меѓу најбогатите десетмина се и Леброн Џејмс, Роџер Федерер, Тајгер Вудс, Фил Микелсен, Мани Пакјао, Кевин Дурант и Луис Хамилтон. Единствената жена во Топ 40 е тенисерката Серена Вилијамс со 215 милиони, што е речиси двојно помалку од 400-те милиони на Формула 1 шампионот Хамилтон кој е десетти.

The post Не е ни Меси ни Роналдо – еве кој е најбогатиот спортист на светот appeared first on Галама.

Православните христијани кои се водат според Јулијански календар во недела ќе ја пречекаат Православната или Старата нова година.

Голем број македонски семејства Василица ја празнуваат како домашна слава, а оние кои го носат името на Свети Василиј Велики го слават својот именден.

На Василица верниците кои се водат по овој календар кршат и лепче со паричка и исто така се верува дека на оној кој ќе му се падне паричка ќе биде среќен во текот на целата година.

Старата година се испраќа и со палење василичарски огнови, кои се симбол на божествената светлина што, според народното верување, ги прогонуваат лошите сили.

Инаку, Свети Василиј Велики е еден од тројцата најголеми црковни учители од четвртиот век. Родум бил од Кападокија, а завршил школо во Атина. Тој бил голем христијански филозоф, а се прославил и како епископ и заштитник на чистотата на православното учење. Свети Василиј Велики се упокоил на 14 јануари во 379 година.

На 1 јануари според стариот (односно 14 јануари според новиот) календар христијанските верници празнуваат три празници: Обрезание Господово, Свети Василиј Велики и Православна Нова Година.

Според еврејските закони секое машко дете на осмиот ден од раѓањето се носело во храмот каде што било обрежувано, а притоа му било давано и име. Овој чин се сметал за воспоставување врска со Бога поради што необрежаните се сметале за неосветени и нечисти, а со тоа и отпадници од еврејскиот народ. Исус како божји син можел и да не биде обрежан, но тој не дошол на земјата за да ги негира законите туку за да ги потврдува и да служи за пример. Поради тоа светото семејство на осмиот ден од раѓањето го донесло во храмот новородениот син каде што по извршувањето на овој обред му ставиле име, онака како што им рекол ангелот при јавувањето на Света Дева Марија, Исус (еврејски збор што значи Спасител) и Христос (грчки збор што значи помазан). Во Евангелието според Лука е запишано: „А кога се навршија осум дена, за да биде обрезан Младенецот, Му кладоа име Исус, известено од ангелот уште пред да биде зачнат во утробата.“ (Лука, 2, 21) Во спомен на овој настан светата црква го востановила празникот Обрезание Господово на осмиот ден по Божик ‒ денот на Христовото раѓање.

Како што може да се види „Христос го прими обрезанието како што предвидуваше Старозаветниот закон. Бидејќи се роди и живееше во конкретна средина, ги пазеше сите одредби и обичаи на таа средина. А бездруго обрезанието треба да се протолкува низ богословието на понижувањето (кеносисот), што го прими за спасение на човечкиот род.“ Имајќи предвид дека празникот на Христовото раѓање не е од најстарите Господови празници, дека најпрво споменот на Христовото раѓање бил слеан во Богојавление, денот на неговото крштевање, (односно на неговото духовно раѓање), и дека подоцна тој настан е поврзан со денот 25 декември, може да се рече дека и денот на Господовото обрезание подоцна е ставен на осмиот ден по раѓањето. Како што се пее во еден тропар „Слегувајќи Спасителот при родот човечки го прими повивањето во пелени; не се одврати од плотското обрезание…“ Христос, како што од љубов и човекољубие го прими повивањето со пелени, така го прими и плотското обрезание. Тоа крајно снисходење и понижување Христово, од црквата се смета за голем Господов празник.“

Треба да се спомене и тоа дека Исус со обрезанието покажа дека примил вистинска човечка природа. „Тоа е многу значајно, затоа што во древната црква се појавила една ерес која се нарекува докетизам и која тврдела дека Христос не прими вистинска човечка природа, вистинско човечко тело, туку привидно тело.“

Во таа смисла обрезанието има врска и со крштевањето. Зашто, ако како што вели свети Јован Златоуст „плотското обрезание ги одделуваше Израелците од јазичниците“ со светото крштение се одделувале верните од неверните. „Луѓето со обрезанието стануваа добри Израелци, избран народ Божји. Со Крштението и воопшто со животот во Христа луѓето стануваат деца Божји, го стекнуваат посинувањето по благодат и ја победуваат смрта.“

Овој празник се совпаѓа со празникот на Свети Василиј Велики познат и како Кесариски поради тоа што бил најпознат владика во градот Касарија Кападокиска. Роден е во овој град, во 329 година, од побожни родители, татко кој исто така се викал Василиј и мајка Емилија. Уште мал се стекнал со образование, примил свештенички чин и го учел народот на божјата наука. На големата популарност му завидувал тогашниот владика во Кесарија поради што Василиј заминал во пустина каде што останал до смртта на владиката. Потоа се вратил и бил поставен за владика, направил многу добри дела по кои црквата сè уште го споменува. Умрел на 1 јануари 389 (според некои 379) поради што црквата секоја година на овој ден го празнува споменот на неговото име. Останал како пример за позитивни човекови особини поради што црквата го нарекла Велики.

Поради совпаѓањето со празникот на Свети Василиј овој празник во народот најчесто е познат како Василица, а тоа најповеќе асоцира на обичаите и верувањата поврзани со Новата Година. Василица се паѓа во периодот на т.н. Некрстени денови, период што трае од Божик до Водици, кога според легендата Исус не бил крстен и ѓаволите се мачеле да го излажат да не се крсти и да не се исполни волјата божја. Се верува дека овие денови за човекот се опасни бидејќи тогаш мртвите се во движење, разни вампири, караконџули, вештерки, самовили и други нечисти сили се активни и на сите начини сакаат да му напакостат. За заштита од овие негативни демони човекот во овој период избегнувал некои потешки работи, но изведува и разни магиски заштитни дејствија. Особено познати се некои обичаи, како бабарските, русалиските и сл. од кои траги на почвата на Македонија се одржале до денес. Посебно интересна е една драмска игра со маски која се среќава на теренот на цела етничка Македонија, но секаде со различни имиња според имињата на учесниците во играта: во Охридско ‒ василичари, во Битолско ‒ бабари, во Скопско-џамалари, во Тиквешијата ‒ џаламари, во Разлошко-сурваскаре, во Костурско и други места во Егејска Македонија ешкари итн. Иако во повеќе места оваа драмска игра се играла во текот на сите дванаесет Некрстени денови, сепак, таа најчесто е поврзана со празникот Василица.

Важно е да се одбележи дека како ретко кој празник децата одделно од возрасните Новата Година ја пречекуваат со посебни обичаи, игри и песни кои многу се различни од оние што ги изведуваат возрасните, но се блиски до обичаите и песните што се изведуваат на Бадник. И на Василица како и на Бадник групи деца најпрвин околу заедничкиот оган, а потоа одејќи по куќите низ селото или градот, пеат пригодни песни за што добиваат подароци. И овие песни како и коледарските од Бадник немаат развиена мелодија туку се кажуваат со скандирање, со карактеристични извици на почетокот и на крајот, а и во мотивска смисла се блиски. Низ песната се искажуваат многу убави желби и благослови за родна година:

Сурова, сурова година

голем клас на нива,

голем грозд на лоза

жолт мамул на леса,

живо здраво до година.

до година до амина.

Децата, исто така, носат прачки, дренови или сливови, со кои ги удираат луѓето, особено старите и болните лица, обичај што се вика суровење, што значи и тие да се сурови (здрави) како прачката. Тоа се прави и со домашните животни особено со коњите, воловите и овците поради што домаќинот василичарите ги одведува во шталата.

Возрасните за овие прослави се подготвуваат од порано. Тие набавуваат прибор за маскирање, предмети за тропање и правење врева, како ѕвонци, клопотарци, тенеќиња, тенџериња, но и музички инструменти: гајди, кавали, тапани и сл. Со овие реквизити се создава голема врева која има цел не само да создаде весела атмосфера туку и да ги заплаши и избрка лошите духови.

Во василичарските дружини одат луѓе веселници, луѓе што знаат да се шегуваат. Обичаите што притоа ги изведуваат претставуваат вистинска народна драма со точно определени улоги на учесниците, со маскирање и други елементи присутни во фолклорниот театар.

Во Скопско овие дружини броеле 30 до 50 учесници од кои се избирале четворица „маскарџии“. Меѓу нив двајца биле „старци“, а други двајца ги играле улогите на две млади жени ‒ невестата и орваната. Другите учесници во тајфата претставувале „деца“ или „војска“. Во играта што ја играле добриот старец го убивал лошиот, што значело дека добриот дух го убивал лошиот што од друга страна, пак, требало да значи обезбедување на благостојба во куќата и богат род на земјоделските култури. Во Горноџумајско овие дружини броеле 15-20 момчиња и се викале „сурваскаре“. Еден од нив го викале мечка, друг мечкар, трет се правел невеста и бакнувал рака. Во селата Емборе, Дебрец и Палиор во егејскиот дел на Македонија се играла Мала и Голема Ешка. Првата ја изведувале децата, а втората возрасните. Во Дебарца (Охридско) главни актери во оваа игра биле зетот, невестата и гатачот.

Овие василичарски дружини во секоја куќа, или, ако не ги пуштале да влезат поради тоа што биле многу вулгарни, во дворот ја играле споменатата драмска игра за што добивале подароци (месо, грав, компири, зејтин и др.) од кои правеле заедничка гозба. Таму, пак, каде што не ги дарувале правеле некоја штета најчесто кршеле нешто што ќе најделе во дворот на пр. плуг, брана, кола и сл. Се внимавало две василичарски дружини да не се сретнат зашто редовно доаѓало до тепачки што траеле сè додека некој не загинел за што сведочат топонимите Василичарски гроб, Бабарски гроб итн. што ги има низ цела Македонија.

Постојат повеќе обичаи и верувања што се директно поврзани со започнувањето на Новата година. Тука во прв ред е прогнозирањето на среќата и напредокот на секој член од семејството како и на стоката и на земјоделските култури. Во загреана пепел или во нагорена црепна се ставаат зрна жито и во зависност од тоа колку ќе скокне зрното се гледа колку ќе има напредок во претстојната година. Исто така, во црепна се ставаат жарје и се покриваат со вршник, а потоа се гледа тие што се изгорени со бела пепел ќе имаат напредок, а тие што се изгаснати, црни јаглења, ќе доживеат болест и несреќа. На Василица во некои места месат и погача или баница со пара, како што тоа во повеќе места се прави на Бадник, и со тоа се прогнозира кој член од семјството ќе биде најсреќен. Според некои верувања на Василица секој требало да облече нешто ново за да го износи во текот на годината.

Во Разлошко спроти Василица се правела „Суровна најатка“ и така се викала бидејќи вечерта децата оделе на сурова и со дренови гранки ги сурвакале возрасните посекувајќи им здравје во новата година. Суровната најатка се правела со мрсна храна. Притоа се правела и пита во која се ставале и паричка и гранка од дрен. И овде се верувало дека тој што ќе најде парата ќе биде богат, а тој што ќе ја најдел дреновата гранка ќе бидел успешен земјоделец и ќе спечалел многу стока.

Во селото Битуше наспроти Василица правеле суровици и низалки со костење. Суровиците ги правеле од едно лозово и две дренови гранчиња, изврзани со бел и црвен преден волнен конец. Суровицата била долга околу шеесетина сантиметри, а на врвот се врзувала рачно плетена киска и сребрена пара. Во минатото суровици се правеле за машките деца, а во поново време се правеле суровици и за женските деца. Низалките се правеле од костени, на тој начин што на подебел конец со игла се нижеле варени костени. Меѓу костените се ставале шеќерчиња, а во средината на низалката се врзувало и варено јајце. Во поново време наместо јајце се ставало чоколадо.

Во селото Вевчани се одржува прочуениот Вевчански карневал кој од година во година станува сè помасовен и попопуларен. Како туристичка атракција тој е посетен од многу гости и тоа не само од нашава земја. Во формата во која денес се одржува во него гледаме мноштво традиционални обичаи, но и некои елементи што се од поново време. Во Вевчани Василица се празнува два дена, на 13 и 14 јануари (н.с.). Василичарите се организираат во групи, зависно од маалската припадност, во василичари од Горна и од Долна маала. Секоја од овие групи си има свој конак, каде што се собираат и подготвуваат. Секоја група си има свој василичарски бајрак, што се чува во црквата „Свети Никола“ и се користи само во оваа пригода. Бајраците се носат пред поворката додека василичарите шетаат низ селото. Секоја василичарска група има традиционални ликови: зет и невеста, потоа поп, ѓавол и Глупавиот Август. Зетот, облечен во народна носија носи и патерица со која ги фаќа луѓето за вратот, ги доближува за да им бакне невестата рака, а тие да ја даруваат со пари. Невестата, секогаш е машко лице, облечено во невестинска облека и претставува симбол на плодноста. Составен дел на василичарските групи се и свирачите кои ги веселат присутните.

Василичарските поворки тргнуваат на 13 јануари (с.с.) на пладне. Одделно одат горномаалските и долномаалските василичари. Ги минуваат сите улици одејќи надесно и застанувајќи на секоја крстосница каде што играат. Василичарите ги посетуваат сите домови, играат ора и пеат песни по што добиваат дарови во пари или продукти. Насекаде се пее василичарската песна:

По мене бабо, по мене, како струпска ертица,

како прилепска ножница, сурва, сурва година.

Сурва, сурва година, голем клас на нива,

голем грозд на лозје, жолт мамул на леса,

црвено јаболко в градина, живо-здраво до година,

до година до амина, пара, пара домаќине!

Вечерта, по полноќ, околу 2-3 часот, откако василичарите ќе минат низ сите куќи се оди На вода на познатите Вевчански извори. Тоа е означено и со биење на камбаните. Тука се присутни сите селани сообено женскиот свет. На вода се носи литургија, котле или ѓум за вода, дрвена лажица и василичарска киска. Киската се прави од босилек, василичарка (растение со боцки) и гранки од дрен. Сите тие се поврзуваат со црвен волнен конец. На изворите попот испева молитва со што ја осветува водата. Потоа сите присутни во специјални садови земаат од водата и ја носат дома. Со оваа светена вода се попрскуваат сите простории во куќата. Со оваа вода се подготвува кашаник (тури-потпечи) во кој се става сребрена пара. Тој што ќе ја најде парата се смета за најсреќен во семејството. Киската се става над влезната врата и тука останува цела година како заштитник на куќата од разни лошотии: демони, несреќи, елементарни непогоди и сл.

На 14 јануари најпрвин се одело во црквата, а потоа низ селото. Тогаш се оди во сите домови во кои има Васил и се честита именденот. Попладне сите се собираат на средселото каде што се игра Василичарското оро. Секоја група имала свое оро, а потоа сите се обединувале во едно заедничко оро.

На 15 јануари се организирала заедничка гозба. Тогаш се броеле собраните подароци, главно парите, и се решавало за што ќе бидат искористени. Секогаш се користеле за некои добротворни цели, изградба на чешма, водовод, црква, училиште итн.

Во василичарските празнувања во Вевчани покрај традиционалните елементи, ликови, маски и сл. има и нови елементи, пред сè маски и активности со кои се критикуваат некои настани или личности од изминатата година. Поради тоа што оваа манифестација доби поголема масовност и атрактивност во 1993 година Вевчани со својот карневал стана член на Здружението на европските карневалски градови. Вевчанските василичари учествувале на многу карневали во светот.

Очигледно е дека обичаите и верувањата поврзани со празникот Василица потекнуваат од претхристијанско време и дека нивна цел е да обезбедат среќа и напредок на поединецот но и на пошироката заедница.

Народна песна

‒ Сива, сива Василица,

каде си се осивила?

‒ Тамо долу на Бел Дунав!

‒ Што имаше, што немаше?

‒ Ми имаше златна чаша,

златна чаша канатица,

ми канеше слава Божа,

слава Божа и Божика.

Божик ми е небото,

слава му е на земјата!

Оооооо и в година!

Благослов

Колку трна, претрна, толку амбари пчејнца!

Колку капки сланина, толку прасци в кочина!

Колку трошки сирење толку јагниња, јариња!

Колку писма, преписма, толку синчиња, ќерчиња!

Тропар

Нова година ‒ Обрезание на Господа Исуса (1/14 јануари)

Ти што седиш во висините на огнозрачен престол со Беспочетниот Отец и Божествениот твој Дух, си благоволил да се родиш на земјата од девојка, недопрена од маж, Твоја Мајка, Исусе. Поради тоа, си бил и обрезан како човек осмодневен. Слава на Твојата себлага одлука; слава на Твојата грижа; слава на Твојата милост, единствен Човекољупче.

Свети Василиј Велики (1/14 јануари)

Твојата проповед се рашири по целата земја; таа го прими твоето слово, со кое божествено учеше; си ја објаснил суштината на сè што постои; човечките обичаи си ги украсил, небеска светлино, оче преподобен, моли го Христа Бога да ги спаси нашите души.

Вевчански кашаник

Познат специјалитет што се правел во Вевчани, особено за празникот Василица, бил познатиот Кашаник. Се замесувал со крстената (светена, пејана) вода. Кашаникот се правел утрото на Василица, 14 јануари (н. с.) во него се ставала паричка и тој што ќе ја најдел при делењето на храната се сметал за најсреќен во текот на престојната година.

Кашаникот е некиснато тесто, мешавина од пченично брашно со квасец. По месењето тестото веднаш се пече во бакарна тепсија или черепна (црепна) со сач (вршник). За печењето на кашаникот е потребна и пирустија. Тепсијата се подмачкува со свинска маст (сало), сега тоа се прави со зејтин, потоа се полева о една губа (кора) од замесеното тесто. Потоа се става на пирустијата под која има жарје. Врз тепсијата се става сачот којшто претходно е вжарен на огништето (кланикот). Вака губите се печат една врз друга додека кашаникот е готов.

Кашаникот е вевчански специјалитет што редовно се служи на гостите на Василица. Се служи со луканки (вевчански колбаси) и со кисело млеко. (Подготви Марко Китевски)

The post Во недела е Стара нова година, внимавајте ова е задолжително appeared first on Галама.

Кире Лазаров, македонската ракометна легенда, неодамна потпиша договор нов договор со екипата на Нант до 2021 година.Овој договор ќе биде и последен во кариерата на Лазаров.

Како што самиот потврди во интервју за „Балкан Хендбол“ Лазаров после овој договор ќе стави крај на неговата блескава кариера.

„Ќе се обидам луѓето да ме паметат по добро, да не се сеќаваат дека сум се влечел по теренот. Мислам дека овие две години ќе бидат последни во мојата кариера.

Така и се договоривме со управата кога преговаравме за новиот договор. Од нивна страна тоа беше навистина коретно, им се случи и со Доминик кој ја заврши кариерата тука“, изјав помеѓу другото Лазаров.

Потоа тој зборуваше и за очекувањата за македонскиот ракомет после неговото пензионирање. Кире потенцираше дека очекува Македонија да остане силна и после неговото заминување.

„Јас многу дадов за Македонија, но и Македонија ми даде многу, секогаш ќе го почитувам тоа. Нам постојано ни се случуваат истите работи. Ние сме „сељачки” спорт, во фудбалот селекторот не може да води репрезентација и клуб.

The post Се ближи и тој момент: Кире Лазаров за првпат откри кога ќе ја заврши кариерата appeared first on Галама.

Денес на програмата беше последната трка од сезоната во македонскиот авто-мото шампионат која што се возеше повторно на улиците во Скопје.

Натпреварувачот од Струмица Мики Тодоров доживеа несреќа, откако со неговиот автомобил се истумба, удирајќи се во една од безбедносните гуми.

На трката учествуво зедоа околу 30 натпреварувачи, како од Македонија, така и од Србија.

Тодоров се наоѓа во добра здравствена состојба и се огласи на својот профил на „Фејсбук“.

„Заврши сезоната за мене. Жив здрав што е најбитно.Следната година повеќе“, напиша Тодоров.

The post ВИДЕО: Стравична несреќа на трката во Скопје – како на филм се превртуваше автомобилот appeared first on Галама.

Милан Павков, херојот на Црвена звезда кој со два погодока го „сруши“ Ливерпул, изјави дека при постигнувањето на вториот гол не бил свесен што се случува. Павков погоди во 22. и 29. минута со удар од 30-ина метри.

– За првиот гол бев свесен, ама при постигнувањето на вториот не ми се веруваше во тоа што го гледам. Ја земав топката, добив идеја да шутнам и тоа е тоа. Беше тешко, но постигнавме историска победа. Сите сме се уште под впечатоци од натпреварот. Просто не можеме да поверуваме што направивме, потенцира Павков.

Со триумфот над Ливерпул, белградските „црвено-бели“ ги задржаа шансите за пласман во следната фаза од Лигата на шампионите.

The post Изјава на Павков по големата победа на Звезда над Ливерпул appeared first on Галама.

Маја Китановска е една од ракометарките кои летово се приклучија на новоформираниот клуб ЦЕМС. Влегла со амбиции и со позитивни очекувања, арно ама заедно со времето се трошела и надежта дека нешто од најавеното ќе биде остварено. Два и нешто месеца по почетокот на работењето на клубот и таа е една од ракометарките кои револтирани си заминаа од клубот, заедно со тренерите, но таа дополнително поминала лична драма, предизвикана од претседателот Бојан Захариев.

Маја доаѓа од Делчево, па во преговорите со ЦЕМС, поточно со Захариев, ѝ било ветено и сместување. Ни раскажа како тоа не сaмо што не се остварило, туку клубот не ѝ подал рака дури и кога останала на улица.

„Првпат се слушнав со Бојан во јули, телефонски, го прашав за услови и ми кажа дека ќе имам сместување, храна и се разбира разговаравме за финансискиот дел. Во август дојдов во Скопје и потпишавме договор на една година, со договорена сума, договорено сместување за цела година, три оброци дневно… Три дена подоцна почнавме со подготовки, тој нѐ смести во еден хостел мене и уште две девојки од Струмица. Таму седевме една недела, а потоа, бидејќи тие две се средношколки, ги префрли во интернат. И мене ми рече да седам во интернатот во месец август, па од 3 септември – ‘станот те чека’“, ни раскажува Китановска.

Во ветениот стан требало да седат под кирија заедно со уште една ракометарка, од Неготино, која доаѓала специјално за ангажманот во ЦЕМС, за разлика од Маја и уште неколку кои студирале или биле во средно училиште во главниот град.

„ Дојде 3 септември, јас го барав Бојан, тој ретко одговараше на телефон, па по СМС ми даваше изговори од типот да се снајдам уште еден ден. И така беше додека директорката на интернатот не ме викна и ме предупреди дека морам да го напуштам, бидејќи тој е наменет за средношколци, а јас сум студентка. Бојан ми рече дека ќе разговара со директорката, но тоа не се случи, таа ми рече ‘не можеме да те држиме’ и јас останав на улица. Се вратив во Делчево и патував до Скопје за секој натпревар. Чекав, чекав за најавениот стан, ништо не се случи. Дури не ми се ни јави, туку само ѝ кажал на Лина (Треноска н.з.), нашиот тренер, дека не може да најде сместување. Јас не знаев што да правам, бев оставена да скитам, моравме сами да се снаоѓаме со цимерката од Неготино. Едвај најдовме, а тој ни вети дека ќе ни дава пари за кирија посебно од тоа што е договорено како плата од клубот. Ништо не ни даде.“, додава ракометарката

И ако пеколот без перница под главата поминал со најдениот стан, сега проблем била платата која доцнела.

„Ајде парите што не ни ги даваше, екипата немаше ни основни работи, како лепак. Пред натпреварот со Металург (6 октомври н.з.) сакавме да не играме, ама сепак отидовме, а следниот ден нѐ избрка тие што сме му биле трошок. Кога виде дека нема со кого да игра, побарал да се вратиме. Се вративме само заради Лина, затоа што се залагаше и правеше сѐ за нас. Замислете да имавме тренер, којшто е на негова страна. Имавме среќа“, зборува младата делчевчанка.

Потоа дошла кулминацијата на проблемот, кога ракометарките неповратно си заминале, а со нив и тренерот Треноска и спортската директорка Ива Стојковска.

Потоа продолжи истата приказна, се вративме за беспари, не ни кажа ни извинете. Кога и тренерите си дадоа оставка, ние бевме, речиси, сите на нивна страна, 80 отсто, освен тие пет ракометарки кои играа и викендов во Битола.“, дополни Китановска.

Посакува оваа нејзина приказна да не се случи на никоја друга девојка, особено не ако влегува во нешто со искрени намери и само наивна желба да го прави тоа што го сака. По едно вакво искуство прашање е дали воопшто ќе му се врати на ракометот.

„Ја загубив довербата, никогаш веќе нема да гледам на работите како порано. Не знам дали ќе играм повторно“, поентира левото крило.

Извор: Спорт1.мк

The post Потресна исповед: Не измами, не остави на улица и без храна appeared first on Галама.

Марко Златановски, на повидок млад талент во мотокрос и ендуро. Секоја година непрекинато се раѓаат нови таленти во спортот,некои порано,некои подоцна,но
потенцијалот не останува незабележан.

Марко Златановски е седумнаесет годишен ученик во СУГС “Кочо Рацин” и живее во Скопје. Возач – почетник во мотокрос и ендуро од мотоклубот МК Мотори, кој за краток период од 10 месеци активни тренинзи,успеа да постигне одлични резултати на овогодинешните натпревари во јуниор класата.

Вредно е да се напомене, дека љубовта кон моторите и мотокросот, на Марко му ја всади неговиот татко Мирче Златановски:

-Сметам дека мотокросот е извонреден начин да се одржува физичката кондиција, хоби кое го јакне спортскиот дух, но истовремено и преокупација која позитивно влијае врз младите во денешно време, кога во секојдневието се распространети пороците на 21. век, вели Мирче за порталот Галама.

На спортскиот полигон “Стенковец” на 08.10,викендот се одржа третиот по ред “Off Road Show 2018” поделен во два дена, каде Марко првиот ден издвои прво место, вториот ден заврши на второ место,а на официјалното доделување на наградите го освои второто место во македонскиот ендуро шампионат.

Наредниот викенд, 14 октомври, се одржа третата и последна трка од македонскиот мотокрос шампионат. Трката се одвиваше на популарната патека Орман во близина на Скопје, каде Марко Златановски го освои третото место на натпреварот,воедно за него и прв мотокрос натпревар.

Овој викенд беше последниот Ендуро Шампионат за оваа година “Ендуро Велес 2018” што се одржа на теренот над велешкото езеро “Младост” ,на кој овој млад почетник го освои второто место и ја заврши оваа година успешно, со одлични резултати и несомнено стана миленик на публиката. За него ова е само еден прекрасен почеток како спортист,за кого допрва ќе се слуша.

The post Младиот Марко од Скопје, оваа есен блесна во Мотокрос и Ендуро шампионатот на Македонија appeared first on Галама.

УФЦ шампионот во лесна категорија, Хабиб Нурмагомедов, истакна уште еднаш дека не се смета за виновен за неодамнешниот инцидент по борбата со Конор МекГрегор.

Да потсетиме, по борбата меѓу Дагестанецот и Ирецот, се случи голем инцидент и општа тепачка надвор и во рингот, а потоа беа сите казнети.

Хабиб го загуби хонорарот од борбата и сега му се заканува жестока казна од Спортската комисија во Невада, поради тоа што директно во гради удри член на стручниот штаб на неговиот противник.

„Нема да одам на сослушување во Лас Вегас, се нека ми земат, сите пари кои ги заработив, нека ме исфрлат 10 години. Мечот го завршив според правилата и тука мојата работа е завршена. Никогаш нема да одам таму, нека прават што ќе посакаат. Јас ги бранев моето семејство, религијата и мојата чест“.

„Ако дојде до двобој меѓу мене и Мејведер, тогаш ќе се одржат две борби, првата ќе биде боксерски стандарди, а втората по ММА правилата“, порача Хабиб.

The post „Земете ми ги сите пари, јас само ја бранев мојата чест, семејството и религијата“ appeared first on Галама.

Со светска премиера во Амстердам, Шангај и Сао Паоло, Volkswagen го претстави својот нов T-Cross, а со тоа решително ја продолжува SUV офанзивата што ја започна во 2015 година.

Овој комплетно нов модел наскоро ќе ги маѓепса пазарите на три континенти и ќе ги освежи со комбинација на стил, практичност, флексибилност и економичност, додека во истовреме ќе постави нови стандарди за својата класа. Оттука, моделот на урбан кросовер се покажува како идеален придружник во секојдневниот живот.

The post Светска премиера на новиот Volkswagen T-Cross (ГАЛЕРИЈА) appeared first on Галама.