Како се прави најдобриот гулаш. За да го приготвите ова превкусно јадење, ќе ви бидат потребни следните состојки: 1,5 кг јунешко месо, 1 кг кромид, 4 чешниња лук, 2 моркови, сол, црн пипер и зачини по ваш вкус.

Постапка: месото исечкајте го на коцки и маринирајте го неколку часови претходно или најдобро преку цела ноќ. Маринадата е пожелна за сите видови немасни меса како што е пилешкото, мисиркиното или јунешкото, па им се додава некоја кисела состојка за да омекне.

Тоа може да биде сенф, лимонов сок или оцет, вино или пиво за да може да продре низ мускулните влакна и да го направи поровко. Се додава сол и зачини по вкус, како и масло. Доколку немате некоја своја вообичаена маринада, тогаш еве еден предлог за класична маринада.

Во еден сад ставете сол, сув зачин, малку црн пипер, малку црвен пипер доколку сакате, 3 лажици соин сос, 1 лажица балсамико оцет, 1 лажичка мед, 1 лажичка сенф, околу 3-4 лажици маслиново масло, малку толчен лук, 1 лажичка тимијан, половина лажичка мажуран.

Убаво промешајте ги состојките за да се изедначат. Измешајте го месото во маринадата од сите страни и оставете го во сад во фрижидер најмалку 4 часа пред приготвувањето. Оваа маринада има нежен вкус, месото го прави меко и едноставно се топи во уста.

Кромидот исчистете го и исечкајте го на ситни коцкички, а истото направете го и со морковот. Земете едно парче сланина од 150 г и ситно исечкајте ја. Во едно длабоко тенџере ставете малку масло и на дното прво ставете го сечканиот кромид. Колку повеќе кромид, толку повкусен гулаш.

После кромидот рамномерно распоредете го и сечканиот морков, а одозгора наросете ја сечканата домашна сланина (дава одличен вкус на јадењето). На крај одозгора распоредете го маринираното месо и тенџерето ставете го поклопено на многу тивок оган.

На овој начин без мешање оставете го да се динста околу 15- 20 минути. Времето за целото готвење е околу 2-3 часа, колку подолго се готви толку е подобар. Зачините не се ставаат на почетокот, туку пред крајот од готвењето. После 15-20 минути малку промешајте го месото.

Месото под капак само ќе си испушти сопствени сокови, па нема потреба да се додаваат дополнителни течности или вода. Повторно поклопете го и малку засилете го огнот, па продолжете со готвењето. Во секој случај, мора да се следи динстањето и доколку се забележи дека нема течност, по потреба да се долее малку вода.

После 50 минути гулашот добива фина кафеавкаста боја и во овој момент е добро да се додаде малку вода за да не загори на дното. Се додава приближно половина литар вода. Малку промешајте, повторно засилете го огнот, поклопете и продолжете со готвењето.

После еден час и 45 минути додадете ситно сечкано лукче, по потреба додадете малку вода, а ако не треба, само поклопете и продолжете со готвењето. После два часа готвење можете да го зачините гулашот. Ставете сол, сув зачин, малку црн пипер и 2-3 мали лажички црвена мелена слатка пиперка.

Промешајте за да се растворат зачините и намалете го огнот за да не ви загоре јадењето. Со додадените зачини гулашот треба да се готви уште околу 30-40 минути. малку вкусете и по потреба досолете или додадете уште некој зачин по потреба и ваш вкус.

Веќе после три часа готвење гулашот треба да е сварен и може да се послужи со ориз, компир пире, палента, разни тестенини… Многу е вкусен сосот, а месото се топи во уста.

Извор: НМД.мк

The post Како да го направите најубавиот домашен гулаш – најдобриот рецепт кој постои appeared first on Галама.

Доколку сакате да јадете вкусни домашни мекици/пирошки наутро, тогаш денес го имаме за вас совршениот рецепт за брзо тесто од кое ќе ги добиете нејпуфнастите мекици. Може да ги послужите со фил по ваш избор (или без), а готовите мекици се меки како памук и целите се со меури. Еве како да направите меки меки од ова брзо тесто:

Потребни состојки: 400 г брашно, 1/4 лажиче сода бикарбона (3 г), 2 лажички вотка, 200 мл кефир/густ јогурт или кисело млеко, 1 јајце, 1 лажица шеќер, половина лажиче сол, 30 мл сончогледово масло за подлогата

Постапка: измешајте го брашното со сода бикарбона, а потоа просејте го. Во средината направете вдлабнување и истурете 2 лажички вотка. За фил: може да користите било каков фил освен свежо месо.

Во овој рецепт јас користев мешавина од варен компир и варено пилешко месо. Во посебен сад ставете јогурт на собна температура, едно јајце, сол и шеќер. Добро изматете, а потоа течната смеса соединете ја со сувите состојки.

Замесете го мекото тесто кое на почетокот малку се лепи на раце. Покријте го со крпа и оставете го одмори во садот 15-30 минути, за да се активира глутенот. После тоа, тестото ќе се промени и ќе биде многу полесно за работа.

Ќе стане еластично и нема да се лепи. Одмореното тесто истресете го врз набрашнета работна површина и премесете го. Формирајте валјак. Врз работната површина истурете 30 мл масло и тестото намастете го.

Потоа поделете го на онолку делови колку што сакате да правите макици (помали или поголеми). Од секое парче формирајте топче. Јас добив 11-12 топчиња. Потоа секое топче малку со прстите сплескајте го.

Ставете една лажица фил по ваша желба и затворете го убаво од сите страни, за да не истекува филот при пржењето. Формираните мекици и пржете ги во добро загреано масло на умерена температура.

Кога ќе започнат да се појавуваат меури од горната страна, свртете ги да се испржат и на другата страна. Кога убаво ќе заруменат од двете страни, вадете ги врз хартиена салветка за да се впие вишокот маснотија.

Уживајте во нивниот вкус. Деталите од целата постапка можете да ги погледнете во фотографиите:

Извор: НМД.мк

The post НАЈПУФНАСТИТЕ МЕКИЦИ СО МЕУРИ: Со 1 чаша јогурт и 1 јајце ќе го добиете најдоброто тесто appeared first on Галама.

Пилешки медалјони, многу сочни и вкусни, ги правам постојано.Рецепт на Валентина од каналот Кујната на Валентина Машковиќ.

По овој рецепт ќе ви излезат многу вкусни. Сите го сакаме пилешкото, но сите знаеме дека доколку се превари или препржи може да биде многу суво.

Сега ќе ви покажам како го подготвувам јас, а после ова и вие ќе го практикувате овој метод. Тајната на сочноста е само 1 состојка. Ова може да го практикувате и со шницли од свинско или јунешко месо, а за возврат добивате сочно месо.

Јас моментално правам пилешко филе, месо околу 1 кг, но може да си земете колку сакате. Ставете еден по еден стек во поголем сад и зачинете по вкус. Од зачини користам: сол, црн пипер, рузмарин и малку вегета.

Тајната состојка е во зачинетото месо да ставите млеко кое треба да отстои заедно со стековите. Млекото треба да го прелие месото, а потоа се остава да отстои околу половина до еден час, покриено со проѕирна фолија.

Многумина не го знаат ова, но млекото ја извлекува маснотијата и го омекнува, му дава сочност. На овој начин повеќе нема да ви биде суво и жилаво. По отстојување, месото се похува со брашно, презла и масло.

Потоа, секое парче месо се става во брашно, па во презла и се пржи во претходно загреано масло.

Овие шницли уште се нарекуваат и виенски, но доколку не сакате да е премногу масно, може да испржите без похување и на тој начин ќе бидат многу сочни и неодоливи. Деталите од целата постапка погледнете ги во видеото ОВДЕ.

Ви претставуваме уште еден начин на подготвување на пилешкото. Рецепт за пилешко кој треба веднаш да си го запишете. Во овој рецепт, месото се маринира, но во секој случај треба да ја подготвите постапката со млекото која погоре ја споменавме.

Потребни состојки: 500 г пилешко филе (или по избор), 250 мл јогурт, босилек, масло. За маринада: 2 лажици масло, 1 лажица црвен пипер, 1 мала главица црвен кромид, 2 чешниња лук, сол, црн пипер..

Постапка: Во блендер или рачен миксер направете маринада од месото со масло, црвен пипер, кромид и лук. Месото натопете го во подготвената смеса и оставете да отстои некое време, може и преку цела ноќ.

Запржете го месото, а доколку ви остане од маринадата прелијте ја одозгора врз месото. Потребно е добро да се испржи од двете страни, па потоа прелијте со јогурт во кој сте ставиле ситно сечкан босилек.

Оставете да се крчка уште малку додека да ја добие посакуваната густина, па послужете со гарнир по желба. Одлично одговара со златна мешавина од зеленчук или варен компир / пире.

Извор: НМД.мк

The post Додајте само 1 состојка и пилешкото никогаш нема да ви биде суво и жилаво – тајната на професионален готвач appeared first on Галама.

Мали тајни од големите и познати готвачи ќе ви го олеснат правењето на тесто, а отсега па натаму работата во кујна ќе ви биде како песна.

Можеби веќе сте станале искусни со брашното и месењето теста, но можеби тукушто започнувате да учите нови техники и да ја запознавате убавината на месењето и печењето на домашни печива.

Разни домаќини и домаќинки го месат тестата на различен начин, но кога станува збор за состојките кои се користат во рецептите, претежно се користат истите: брашно, јајца, млеко, вода, квасец, масло…

Може да постојат разни варијации кои претежно се присутни во соодносите на состојките или во редоследот на додавањето на истите.

Овие трикови се универзални, па така, не мора да ги прилагодувате своите проверени рецепти, туку само во идните приготвувања да обратите повеќе внимание на овие детали.

За да се измеси совршен леб, кифлички или разни други печива, потребно е време и искуство односно умешност, па затоа, доколку сте почетник, не треба веднаш да се разочаувате после првиот неуспех и да се обидете повторно.

Искусните готвачи познаваат некои мали тајни од кујната, но многу важни, а кои ги користат секогаш кога замесуваат тесто, и на тој начин го заштитуваат од ненадејно сплес-нување или да не стаса и да не порасне убаво.

Ова се нивните совети, односно поуки треба да направите или да ставите, за вашите теста да бидат исти како од најдобрите ресторани:

Пред воопшто да започнете со месење на тестото, треба да ги подготвите сите состојки, па дури и садот во кој ќе месете, кој патем треба да биде беспрекорно чист и сув. Извадете го путерот да омекне на собна температура, а истото важи и за јајцата. Не ги користете јајцата директно од фрижидер, особено не кога приготвувате тесто.

Доколку тестото го подготвувате со квасец, истиот бара шеќер и топлина за да може да се активира. Секогаш замесувајте го со млако млеко или млака вода, а газирана вода доаѓа во предвид летно време или на собна температура. Истото важи и за јогуртот.

Ладните состојки можат да ја нарушат текстурата на вашето тесто, па подоцна ќе се разочарате додека гледате како се развива во неочекуван правец. Кога станува збор за прашокот за печиво, гледајте да го додавате некаде на крајот од замесувањето на тестото.

Не прете-рувајте со количината на прашокот за печиво или квасец, бидејќи постои можност тестото да нарасне премногу и да се создадат пук-натини. Секогаш ридржувајте се според пропишаните количини предвидени во рецептот.

Практикувајте рерната да ја вклучувате порано од предвиденото за да има време убаво да се загрее. Тестото секогаш печете го во загреана рерна, бидејќи сите теста кои содржат прашок за печиво или квасец, едноставно „така“ се печат за да пораснат убаво и да формираат тенка, крцкава кора.

Почекајте 10 до 15 минути рерната да ја постигне посакуваната температура и потоа ставете го тестото да се пече. Не гоставајте во ладна или во млака рерна, затоа што така нема да го постигнете посакуваниот ефект и најверојатно ќе добиете тврда и дебела кора.

И за крак златниот совет на искусните готвачи гласи: Во секое тесто ставајте по една лажица јаболкова киселина. Здраво е, тестото подобро нараснува, а покрај сè, тоа ќе добие одличен вкус.

The post Ставете една состојка и тестото ќе биде совршено appeared first on Галама.

ОВИЕ БРЗИ УШТИПЦИ КОИ НЕ ВПИВААТ РЕЧИСИ ВООПШТО МАСЛО, секој втор ден ги правам, а децата ги сакаат и благи и солени. Рецепт од каналот Мој Агол. Нема поубав и повкусен појадок или вечера од овие уштипци.

Ви велам, откога ми беа мали децата почнав секојдневно да ги правам, а до ден денес се уште ми ги бараат. Ги јадат и благи и солени, а се подготвуваат за неполни 30 минути. Нема побрз рецепт за подготовка на уштипци од овој, а потребни ви се само 5 состојки.

Во некои краеви се нарекуваат и пишии односно тестото е исто како и за мекици само што начинот на подготовка е различен. Пишиите се прават од кора и директно се пржат во тавчето, како што е првиот рецепт, а уштипците се црпат со лажица па се ставаат на пржење.

Тоа е единствената разлика, а за вкусот не можам да ви го доловам. Толку многу се вкусни што буквално се совршен брз појадок или вечера. Се комбинираат со разни намази од солени до благи.

Потребни состојки: 2 јајца, 300 мл јогурт, 1 чајна лажичка сол, 600 г брашно (јас користев тип 500), 1 ќесичка прашок за печиво или 12 г.

Постапка: Сите состојки си ги спремив во посебен сад, а потоа само ги додавав во поголем сад за замесување на тестото. Најпрво додајте ги двете јајца и изматете ги со рачна жица, маталка.

Потоа додајте 300 мл јогурт, 1 чајна лажичка сол, па повторно добро промешајте. Постепено додавајте го постепено брашното и додајте 1 ќесичка прашок за печиво. Како што го додавате брашното, мешајте се додека да се формира тесто, нелепливо под прсти.

На крајот треба да добиете тесто кое лесно ќе се одвојува од садот и нема да лепи. Подготвеното тесто се префрла на набрашнета рамна површина, па се развлекува со оклагија околу 5 мм во дебелина.

Потоа се сече тестото на еднакви вертикални линии, а потоа на помали хоризонтални, како коцки. Вака исеченото тесто се остава да отстои 10 минути, а во меѓувреме во тенџере на рингла се става маслото да се загрее.

Во загреаното масло се пржат уштипците колку што собира во тенџерето, прво се пржат од едната па од другата страна, додека да заруменат, а потоа се вадат на поголема чинија со хартија за да излезе од нив маслото. Деталите од целата постапка може да ги погледнете во видеото ОВДЕ.

II РЕЦЕПТ. Потребни состојки: 1 јајце, 200 г брашно, 1/2 ќесичка прашок за печиво, сол, околу 150 мл јогурт и масло за пржење.

Постапка: Изматете го јајцето со јогуртот, посолете и додајте брашно и прашок за печиво. Добиената смеса треба да изгледа ниту премногу течна, ни прегуста, да може да се црпи со лажица.

Маслото загрејте го и веднаш намалете ја температурата за да не поцрнуваат пребрзо уштипците. Во тој случај внатре ќе останат недопечени, а однадвор ќе добијат кафеава боја. Значи, печете ги на умерен оган додека да заруменат од сите страни.

Од тестото црпете со кафена лажичка која секојпат претходно треба да ја натопите во топлото масло во кое ги пржите уштипците. Послужете ги топли или ладни со сирење, ајвар, јогурт.. А може да ги наросите и со шеќер во прав и да ги послужите со џем или лешников крем.

Овие уштипци се навистина многу меки како памук, затоа што се приготвени со јогурт. Доколку ги сакате да бидат крцкави, тогаш пригответе ги со млеко наместо јогурт.

The post БРЗИ УШТИПЦИ КОИ НЕ ВПИВААТ МАСЛО, 6 години ги правам вака и уште ми ги бараат appeared first on Галама.

Ппохувани тиквички, мусака со тиквички, уштипци од тиквички, полнети тиквички, пржени, готвени, печени…безброј комбинации сум испробала досега, но првпат ги приготвувам на овој начин – и сите бевме воодушевени од вкусот.

Пробајте го и вие овој рецепт, бидејќи многу е лесен и едноставен за подготовка, а добивате едно многу вкусно јадење кое е одлична идеја за појадок, вечера или закуска, па дури може да се послужи и како прилог на некое јадење.

Потребни состојки за кора: 2 тиквички со средна величина, 5 јајца, сол и црн пипер по вкус, 40 г рендан пармезан. За намаз: 200 г крем сирење, 2 чешниња лук, копар (свеж или сув), кој сака може да збогати со 8 тенко исечени листови шунка или нешто по вкус.

Постапка: тиквичките убаво измијте ги со ладна вода, а потоа отстранете им ги тврдите краеви. Едната тиквичка изрендајте ја (нелупена) на крупно ренде, а втората тиквичка на тенки ленти-кругови. Сечете ги многу тенко, или со помош на ренде.

Во посебен сад пенасто изматете пет јајца со жица-маталка. Додајте половина лажичка сол и половина лажичка мелен црн пипер (или по вкус). Додајте 40 г пармезан и ренданата тиквичка (не треба да се исцедува).

Промешајте со лажица или шпатула додека да се соединат состојките. Сега можете да ја вклучите рерната да се загрева на 180 степени. Плех со димензии 25х35 см малку намастете го и обложете го со хартија за печење.

Смесата од јајца и рендани тиквички истресете ја во подготвениот плех и рамномерно распоредете ја. Израмнете, па одозгора наредете ги тенко исечените тркалца од втората тиквичка.

Редете ги така што секое претходно крукче да го поклопува следното до половина. Вака подготвените тиквички ставете ги во загреаната рерна да се печат дваесет минути на 180 степени.

За тоа време во една чинија ставете 200 г крем сирење. Додајте ситно исечкани две чешниња лук и две лажички свежа или сува мирудија / копар (подобро е ако имате свежа, но може и сува или некој друг зачин по ваш вкус)

Промешајте го намазот додека убаво да се изедначат состојките. Печените тиквички извадете ги од рерна и со помош на хартијата извадете ги од плехот. Врз кората од тиквички ставете уште еден лист хартија за печење и оставете малку да се олади.

Потоа внимателно превртете ги и отстранете ја хартијата на која се печеа. Врз изладената кора нанесете го приготвениот намаз и рамномерно распоредете го преку целата површина.

Одозгора наредете тенки листови сува печеница или шунка (не мора), па внимателно свиткајте го ролатот со помош на долната хартија.

Оставете го во фрижидер да се лади и да се стегне најмалку еден час. Потоа можете да го сечете и послужите.

The post Откако го открив овој рецепт, тиквичките веќе не ги пржам – нешто највкусно што сме јаделе досега appeared first on Галама.

Ова е едно прекрасно печиво, со неодолив вкус и мирис. Едноставно се приготвува само потребно е да се следат чекорите од постапката.

Во овој рецепт печивата се филуваат со кашкавал, но вие по избор можете да ги филувате со што сакате. Можете да ги правите солени, но и слатки, по избор.

ПОТРЕБНИ СОСТОЈКИ: 7 чаши брашно (од 200 мл), 1 чаша млеко, 1 чаша вода (може газирана или обична), 1 лажичка шеќер, 1 чаша јогурт, 2 јајца, 10 г квасец, 1 лажичка сол, 200 г сусам, 100 г путер, 50 гмед, 150 мл вода, 200 г кашкавал или сирење, плех 40х35 см, стасува 2 часа, се пече 25 минути на 180 степени

ПОСТАПКА: за мерење на состојките се користи една иста чаша која може да биде јогуртна од 180 г или обична за вода од 200 мл. Исто така, многу е важно сите состојки да бидат на собна температура или да бидат млаки (јогуртот, јајцата, млекото, водата..)

Во еден подлабок сад ставете една чаша млако млеко, па додајте вода и една лажичка шеќер. Додајте 10 г сув квасец (една лажица или една кесичка), па промешајте за да се растопат состојките.

Потоа додајте 2 јајца на собна температура и 200 г цврст јогурт или кисела павлака. Добро промешајте за да се изедначат сите состојки и да добиете хомогена смеса. Потоа постепено започнете да го додавате брашното во кое сте додале една лажичка сол.

Најпрво мешајте со лажица, а на крај добро измесете го тестото со рака. Треба да добиете средно меко тесто, еластично и мазно, кое не се лепи за раце.

Вратете го во чист сад, покријте го со проѕирна фолија или кеса која од внатрешна страна сте ја премачкале со масло, па со крпа и оставете го тестото да стасува на собна температура околу два часа.

За тоа време тоа убаво ќе стаса и ќе ферментира. Потоа тестото истресете го на работна површинаи нежно премесете го, колку да можете да го поделите на две еднакви половини. Потоа секоја половина формирајте ја како векна и поделете ја на пет дела.

Така, ќе добиете десет парчиња тесто кое е потребно да ги обликувате во топче. покријте ги со проѕирна фолија за да не се сушат. Земете едно топче, малку сплескајте го со дланката, па со помош на оклагира развлечете кора со големина на помала чинија.

Преку цела површина намастете ја со растопен путер на собна температура, па ставете долгнавесто парче кашкавал (пресечено како компирче за помфрит). Здиплете ја кората од сите четири страни, така да добиете долгнавесто печиво.

Во еден подлабок сад растворете 50 г мед со 150 мл вода. Сусамот запржете го малку на сува тава колку да се истостира за да замириса, па оставете го на страна да се олади. Приготвените печива прво натопувајте ги во растворот од мед, а потоа валкајте ги во сусамот.

Приготвените печива редете ги во плех обложен со хартија. Малку одозгора засечете ги, па вклучете ја рерната да се загрева на 180 степени. Ставете ги да се печат околу 25 минути. Деталите од целата постапка можете да ги погледнете во видеото ОВДЕ. Фотографии од постапката:

The post Овој рецепт за тесто го барав долго време откако го пробав во странство – сега го имате и вие appeared first on Галама.

За да направите домашно сирење дома, не ви е потребна голема умешност. Ова сирење може да го направат и тотални аматери во кујната. Потребни се само три состојки, а нема да ви одземе ниту многу време.

Се разбира дека најубаво е сирењето приготвено од домашно млеко, но ако и вие живеете како мене, во град, тогаш сирењето ќе мора да го приготвите од купечко пресно млеко, кое исто така излегува одлично и вкусно.

ПОТРЕБНИ СОСТОЈКИ: 2 литри пресно млеко со поголем процент на млечни масти (3,2 %), малку сол по вкус (1 супена лажица) и 60 мл бел оцет. Уште ќе ви биде потребно: чисто тенџере, газа и метална цедалка.

ПОСТАПКА: Млекото ставете го во поголемо тенџере. Ставете го на тивок оган да врие, па додадете сол по ваш вкус. Одвреме-навреме мешајте. Млекото не смее да зоврие, па пред да почне да врие тргнете го тенџерето од оган.

Потоа додадете го оцетот, па промешајте (ќе забележите како ќе започне да се засирува) и оставете неколку минути да отстои (5 минути се доволни). Во друго тенџере ставете цедалка и над неа газа. Полека ставајте ја смесата од тенџерето кое што претходно го приготвивте, па убаво процедете ја смесата низ цедалката.

Посолете дополнително, доколку сметате дека не е доволно солено. Соберете ја газата, па превртете, а потоа со помош на чинија исцедете. На крајот ставете ја чинијата над газата (во која што се наоѓа сирењето и над чинијата ставете нешто тешко, како на пример, аван).

Оставете го сирењето да отстои околу еден час, а потоа е подготвено за конcyмирање. Во сурутката исто така, може да додадете уште малку сол и да ја користите како солило за сирењето, а остатокот да го складирате во фрижидер и да ја пиете. Деталите од целата постапка можете да ги погледнете ОВДЕ. Прочитајте го следниот рецепт за сирење кое се приготвува со лимонтус (лимонов сок).

Потребни состојки: малку вода, околу 100-150 мл, 5 литри свежо млеко со масленост од 3,2%, 10 г лимонтус (една кесичка) и сол по вкус.

Постапка: На дното од тенџерето ставете малку вода колку да се покрие и навлажни целата површина. Ова се прави за да не загори млекото. Потоа истурете го целото млеко во тенџерето и ставете го на оган да се вари (од 9 на ринглата, ставете на 7 или 8 степен).

Тенџерето поклопете го со капак. Кога млекото малку ќе се загрее додадете сол по желба, приближно една или две кафени лажички, промешајте го добро со дрвена лажица и повторно поклопете го со капакот. Повремено проверувајте го и промешувајте го за да не ви загори.

Кога ќе започне да врие, односно кога ќе се формира дебел слој пена, не дозволувајте да ви претече, туку веднаш во млекото додадете една кесичка лимонтус, а огнот и натаму нека остане на седмица. Внимателно промешајте со лажицата з ада се растопи лимонтусот.

Мешајте непрекинато, па по некоја минута ќе забележите дека од млекото ќе започне да се одвојува густ дел и проѕирен дел, односно сурутката. За ова, веројатно нема да ви биде потребно подолго од една минута, а млекото веднаш ќе започне да се засирува.

Продолжете со мешањето додека убаво да се засири смесата, вкупно приближно две минути. Потоа исклучете го огнот, но оставете го тенџерето и натаму да стои на топлата рингла. Од овој момент повеќе не ви е потребна дрвената шпатула за мешање, туку земете една длабока кутлача.

Засиреното млеко промешајте го со кутлачата и оставете го кратко време да отстои врз ринглата, па тргнете го на страна и оставете го уште 5-10 минути да одмори. Подгответе сито и еден длабок чист сад во кој ќе ја процедите сурутката.

Зафаќајте од засиреното млеко и ставајте во ситото (ако немате сито, тогаш ова правете го преку густа газа. Оваа количина е доволна за само едно сито од кое ќе излезе една пита сирење. Кога ќе се намали количината во тенџерето, подигнете го, па истурете ја преостанатата содржина.

Со дрвената шпатула малку притискајте врз сирењето за да се исцеди што повеќе сурутка. Ова притискање мора да се направи додека сурутката е топла, значи истискајте колку можете повеќе, да остане само сувиот дел.

Потоа ставете една чинија одозгора и добро притинете. Целата сурутка која ќе ја исцедите складирајте ја во шишиња и чувајте ја во фрижидер. Може да ја пиете наместо млеко, бидејќи ги содржи сите хранливи материи и многу е здрава.

А еден дел од сурутката ќе ни биде потребен за подоцна, за да го чуваме сирењето во неа. Вака приготвеното сирење потиснато со чинија одозгора, оставете го на собна температура неколку часови, а најдобро преку цела ноќ, за убаво да се исцеди и стврдне.

Следниот ден можете веднаш да го послужите, превкусно е. Ако го послужувате веднаш, можете да го посолите по вкус, а доколку го оставите подоцна, солта додадете ја во сурутката која ќе биде негово солило.

Солило и складирање на сирењето: исечете го сирењето на помали делови и ставете го во садот во кој ќе го чувате. Одозгора посолете го по вкус. Одозгора прелијте ја сурутката, да биде сирењето целосно прелиено. Вака приготвеното сирење пклопете го и чувајте го во фрижидер, а можете и веднаш да го користите.

Извор: НМД.мк

The post Домашно сирење: Се прави за 10 минути, 1 час потоа може да се јаде appeared first on Галама.

Потребни состојки:

750 г брашно

150 г путер

3 лажици шеќер во прав

2 мали лажички сол

500 мл млеко

50 г свеж квасец

1 јајце и малку сол

Ако правите слатки печива:

​

750 г брашно

150 г путер

125 г шеќер во прав

500 мл млеко

50 г свеж квасец

1 јајце и малку шеќер

околу 30-40 г растопен путер за премачкување

Постапка:

1.Сварете го кратко млекото помешано со шеќер во прав и путер (само до точка на вриење). Изладете ја смесата до 37 степени (на допир на прст), во смесата изматте свеж квасец. Додадете брашно и сол. Замесете мазно тесто.

2.Од тестото веднаш обликувајте 20 топчиња. Секое топче тенко расукајте го и свиткајте го во кифла.

Кифлите редете ги во плех обложен со хартија за печење. Прекријте ги со кујнска крпа и оставете ги да одморат еден час на собна температура. Во меѓувреме загрејте ја рерната на 250 степени.

3.Пред печење премачкајте ја секоја кифла со изматено јајце во кое сте додале малку сол. Печете 8-10 минути во загреана рерна на 250 степени. Печените кифли премачкајте ги со растопен путер или маргарин (30-40 г).

The post Кифлички готови за 10 минути: Сите домаќинки “одлепија” по овој рецепт appeared first on Галама.

Џорџо Дијана, Италијанскиот шеф со Мишелин ѕвезд, за прв пат ќе гостува во Македонија на манифестацијата „Taste Ohrid 2018“. Неговите специјалитети ќе може да ги пробаат среќниците кои ќе бидат дел од специјалната вечера во ресторанот на „Su Hotel“ во сабота, на 13-ти октомври.

Меѓу другите гостински готвачи кои ќе ја збогатат гастрономската понуда се и српскиот шеф Ѓорѓе Крстиќ, романскиот шеф Раду Зарнеску и македонскиот шеф Дејан Карапеев. Како дел од програмата е предвидена обука на локалните готвачи на Факултетот за Туризам и Угостителство – Охрид, Гала вечера и презентација и дегустација на разни локални и морски специјалитети за посетителите на фестивалот.

Покрај светските специјалитети кои ќе бидат понудени на дегустација за посетителите на „Taste Ohrid’, интересна за посетителите ќе биде и понудата на реинвентирани македонски традиционални рецепти. Имено, користејќи локални производи локалните шефови Давид Санџакоски и Никола Ангелкоски, ќе приготват нови вкусови за бесплатна дегустација на „After Work Sunset Party”, со почеток од 17 часот пред „Su Hotel“ во петок, на 12-ти октомври.

Покрај гастрономската понуда на фестивалот, ќе бидат понудени содржини и за љубителите на адреналинските спортови и планинскиот туризам, па во рамките на спортскиот дел од фестивалот посетителите ќе можат да уживаат во прекрасните предели на националниот парк Галичица и Охридското Езеро преку организираните тури за велосипедизам.

Настанот „Taste Ohrid 2018“ е организиран од Општина Охрид и ЕДЕН – туристички кластер за југозападна Македонија, а поддржан од Швајцарската програма за зголемување на пазарната вработливост.

The post Светски познатиот готвач пристига во Охрид appeared first on Галама.